Размер шрифта: A A A
Цвет сайта: A A A A

МАДАНИЙ МЕРОСИМИЗ ДУНЁ НИГОҲИДА

18 Май 2017

Маданият вазирлиги томонидан пойтахтимиз ҳамда Самарқандда ўтказилган халқаро илмий-маданий конгресс «Ўзбекистон маданий мероси — халқлар ва мамлакатлар ўртасидаги мулоқотга йўл» деб номланди.

Анжуман Ўзбекистон электрон оммавий ахборот воситалари миллий ассоциацияси «Ҳаракатлар стратегияси» маркази, ЎзР ФА, Бадиий академия, «Uzbekistan Today» ахборот агентлиги, «Zamon Press info» нашриёт уйи, Конрад Аденауэр Фондининг Марказий Осиёдаги ваколатхонаси, ЮНЕСКОнинг Ўзбекистондаги ваколатхонаси ҳамкорлигида ташкил этилди.

Ўзбекистонда бой маданий меросни асраш ва ўрганиш, халқимизнинг инсоният цивилизациясига қўшган ҳиссасини жаҳон миқёсида кенг тарғиб этишга доимий эътибор қаратилмоқда. Ўзбекис­тон Республикаси Олий Мажлиси ҳузуридаги Нодавлат нотижорат ташкилотларини ва фуқаролик жамиятининг бош­қа институтларини қўллаб-қувватлаш жамоат фонди маблағларини бошқариш бўйича Парламент комиссияси раиси Акмал Саидов, Маданият вазири Маҳмуд Муродов, Ўзбекистон Республикаси Фанлар академияси вице-президенти Баҳром Абдуҳалимов, Ўзбекистон электрон омма­вий ахборот воситалари миллий ассоциацияси бошқаруви раиси Фирдавс Абдухолиқов, ЮНЕСКОнинг мамлакатимиздаги ваколатхонаси раҳбари вазифасини бажарувчи Криста Пиккат, Конрад Аденауэр Фондининг Марказий Осиё бўйича минтақавий вакили Томас Кунце ва бош­қалар шу ҳақда сўз юритди.

Ўзбекистоннинг бой ва бетакрор тарихий-маданий меросини янада кенгроқ тарғиб этиш ва асраб-авайлаш мақсадида ўтказилган тадбирда шарқшунослик, археология, тарих, шарқ қўлёзмалари, нумизматика, тўқимачилик, кулолчилик соҳаларига ихтисослашган мутахассислар, Россия, Канада, Италия, Буюк Британия, Ҳиндистон, Миср, Корея, Бельгия, Голландия, Франция, Германия, Чехия, АҚШ, Хитой, Туркия, Греция, Озарбайжон сингари 40 дан зиёд мамлакатдан келган 140 нафарга яқин хорижлик олимлар, экспертлар, музейлар ва илмий-текшириш институтлари раҳбарлари, илмий журналлар муҳаррирлари, таниқли коллекционерлар, шунингдек, ЮНЕСКО ва ICOMOS (Ёдгорликлар ва диққатга сазовор жойларни сақлаш бўйича халқаро кенгаш) вакиллари иштирок этди.

Халқаро конгресс иштирокчилари икки кун мобайнида илмий жамоатчилик вакилларининг Ўзбекис­тон ҳудудига мансуб бўлган ва дунёнинг турли музейларида сақланаётган моддий ва бадиий маданиятнинг бебаҳо дурдоналарига бағишланган маърузаларини тингладилар.

Анжуман доирасида медиа лойиҳа альбомлари ва видеоверсиялари тақдимоти, «Ўзбекистон ҳудуди — турли маданиятлар ва бадиий анъаналар чорраҳаси», «Ўзбекистон санъати артефактлари дунё тўпламларида» деб номланган илмий мажлислар ўтказилди. Шунинг­дек, Ўзбекистон ҳудудида ва
дунёнинг турли мамлакатлари музейларида сақланаётган моддий ва бадиий маданиятнинг нодир объект­ларига бағишланган маърузалар тингланди.

Тадбирда «Ўзбекистоннинг маданий мероси» туркуми сифатида уч тилда нашр этилган китоб-альбомларнинг дастлабки беш жилди — «Шарқ давлат музейи тўплами» (Москва), «Россия этнография музейи тўплами» (Санкт-Петербург), «Третьяков давлат галереяси тўплами» (Москва), «Ўзбекистон гиламлари ва кашталари дунё тўпламларида» (Россия, АҚШ, Канада, Австралия), шунингдек, «Алишер Навоий асарлари Россия миллий кутубхонаси тўпламларида» (Санкт-Петербург) китоблари намойиш этилди.

Бундан ташқари, нашр этишга тайёрланаётган олти жилд — «Ўзбекистоннинг мусиқий мероси», «Давлат Эрмитажи тўплами», «Давлат тарих музейи тўплами», «Шарқ қўлёзмалари институти тўплами», «Ўзбекистон гиламдўзлиги: асрлар оша сақланган анъаналар» ва «Германия музейлари тўпламлари» тақдимоти ҳам ўтказилди. Ушбу китобларни нашрга тайёрлашда, манбаларни тўплашда мамлакатимизнинг таниқли олим ва тадқиқотчилари, санъатшунос, мусиқашунос ва шарқшунослари иштирок этган.

Конгресс доирасида чет эллик профессорлар, тарих, санъатшунослик фанлари докторлари, санъат соҳасидаги етакчи экспертлар томонидан Ўзбекистоннинг тарихий-маданий меросига бағишланган қисқа маърузалар тайёрланади. Шунингдек, ташкилотчилар ва тадбир иштирокчилари томонидан конгрессга йўлланган қутловлар уч тилда нашр этиш режалаштирилаётган махсус журналга киритилади.

Иккинчи куни анжуман ўз ишини Самарқанд шаҳрида давом эттирди. Меҳмонлар Регистон тарихий мажмуасини кўздан кечирдилар, «Шарқ бозори ранглари» номи остида Тиллакори мадрасасида қадимий бой тархлар ва бетакрор орнаментларга эга бўлган ўзбек гиламлари тарихи бўйича ўтказилган иккита китоб-альбом тақдимотида қатнашдилар.

Шундан сўнг конгресс иштирокчилари халқаро илмий жамоатчилик томонидан «Улуғбек академияси» деб тан олинган Мирзо Улуғбек мадрасасида ўз ишини давом эттирди.

«Ўзбекистон санъатининг ноёблиги ва тарихий маданий аҳамияти» деб номланган учинчи илмий мажлисда иштирокчилар ўз йўналишлари бўйича учта секцияга бўлинган ҳолда маърузалар тингладилар. Меҳмонлар Самарқанд қоғоз фабрикасида қайта тикланган қадимий қоғоз ишлаб чиқариш жараёнини кўздан кечирдилар.

Анжуман якунида «Боғишамол» шарқона боғида конгресс ёпилишига бағишланган тантанали кеча ташкил этилди ва Регистон майдонида 3D мэпинг — ёғдули мусиқий шоу намойиш қилинди.

 

Нуруллоҳ ДОСТОН,

«Ўзбекистон овози» мухбири.

Медиатека

Сўров

ЎзХДП жойлардаги ўз фаоллари, барча даражадаги депутатлик бирлашмалари ва партиянинг ижтимоий ҳамкорлари (маҳалла, бандлик марказлари, манфаатдор корхоналар ва жамоат ташкилотлари)нинг биргаликдаги фаолияти тур... Батафсил