Размер шрифта: A A A
Цвет сайта: A A A A

«ИСЛОМ БИРДАМЛИК ЎЙИНЛАРИ»ДА

18 Май 2017

умумжамоа ҳисобида тўртинчи ўриндамиз

Шу кунларда Озарбайжон пойтахти Боку шаҳрида IV «Ислом бирдамлик ўйинлари» бўлиб ўтмоқда. Унда 54 давлатдан 3000 дан зиёд спортчилар ғолиблик учун курашмоқда. Мусобақада 103 нафар ҳамюртимиз спортнинг 15 тури бўйича мамлакатимиз шарафини ҳимоя қилмоқда.

Мусобақанинг дастлабки 3 кунги натижаларига кўра, Ўзбекистон делегацияси аъзолари умумий ҳисобда 21 медални қўлга киритган эди.

4-5-кунларига белгиланган баҳс­ларда спортчиларимиз 2 олтин, 5 кумуш ва 6 бронза медални жамғаришди.

Хусусан, спорт гимнастикаси бўйича ўтказилган баҳсларда ҳамюртимиз Оксана Чусовитина тая­ниб сакрашда муваффақиятли иштирок этиб, олтин медални қўлга киритди.

Мусобақанинг 5-кунида 58 кг вазн тоифасида кураш олиб борган таэквандочимиз Ниёз Пўлатов ҳам олтин медаль соҳиби бўлди.

Теннисчиларимиз жамоавий баҳс­лар якунига кўра, кумуш ва бронза медалларига сазовор бўлишди. Хусусан, Сабина Шарипова, Камола Умарова ва Полина Маренковалардан иборат аёллар терма жамоамиз кумуш медални қўлга киритган бўлса, эркаклар терма жамоасида Саидаъло Саидкаримов, Акмал Султонбеков ва Сергей Фомин бронза медали учун кечган беллашувда Қатар терма жамоаси устидан зафар қучишди.

Енгил атлетика бўйича 100 метр­га югуриш баҳсларида Нигина Шарипова маррага иккинчи бўлиб етиб келди ва делегациямизга навбатдаги кумуш медални тақдим этди.

63 кг вазн тоифасида иштирок этган Кумушхон Файзуллаева, эркаклар ўртасида Улуғбек Алимов (85 кг) ва Фарҳодбек Собиров (94 кг) кумуш медалга сазовор бўлишди. Достон Ёқубов (69 кг), Манзура Мамасолиева (69 кг) ҳамда Омадой Отақўзиева (75 кг) бронза медаллари билан кифояланишди.

Дзюдо бўйича жамоавий баҳс­лар якунига кўра, эркаклар ва аёллар терма жамоамиз бронза медалига сазовор бўлишди.

Шундай қилиб IV «Ислом бирдамлик ўйинлари»нинг бешинчи кун якунлари бўйича Ўзбекистон делегацияси ҳисобидаги медаллар сони 34 тага етди. Уларнинг 7 таси олтин, 9 таси кумуш, 18 таси бронза медалларидир. Делегациямиз 54 мамлакат вакиллари орасида ҳозирча Туркия, Озарбайжон ва Эрондан сўнг 4-ўринда бормоқда.

Ушбу халқаро турнир олимпиада ўйинлари каби 4 йилда бир марта бўлиб ўтади ва у Ислом мамлакатлари олимпиадаси деб ҳам аталади. Мазкур ўйинларнинг дастлабкиси 2005 йилда Саудия Арабистонида ўтказилган.

Мусобақа 22 майга қадар давом этади.

 

«Ўзбекистон овози» мухбири

Шаҳбоз САИДОВ тайёрлади.

Медиатека

Сўров

ЎзХДП жойлардаги ўз фаоллари, барча даражадаги депутатлик бирлашмалари ва партиянинг ижтимоий ҳамкорлари (маҳалла, бандлик марказлари, манфаатдор корхоналар ва жамоат ташкилотлари)нинг биргаликдаги фаолияти тур... Батафсил