Ижтимоий ҳимоя, аввало, инсонни ҳимоялашдир. Кейинги йилларда бу бўйича янги тизим яратилди, манзилли қўллаб-қувватлаш маҳалла, хонадон даражасига туширилди.

Давлатимиз раҳбари раислигида бўлиб ўтган ижтимоий ҳимоя соҳасидаги ишлар натижадорлиги ва 2025 йил учун устувор вазифалар муҳокамасига бағишланган йиғилишда бу борада олиб борилаётган ишларнинг ҳар бири рақамлар билан келтириб ўтилди.

Президентимиз бу йил ижтимоий ҳимоя бўйича қилинган 34 та муҳим янгиликка қўшимча 28 та янги ташаббусни илгари сурди. Жумладан, келгуси йилда 1 миллион 200 минг аҳолини камбағалликдан чиқариш учун таълим, тўгарак, касб-ҳунар, тиббиёт масалаларини ҳал қилиш ва яшаш шароитини яхшилаш зарурлиги таъкидланди. Масалан, Тойлоқ ва Косонсойда “Илк ривожланиш марказлари” очилиб, камбағал оиладаги ва ногиронлиги бўлган 4 минг 200 нафар болага боғча таълими берилмоқда.

Давлатимиз раҳбари вилоят ҳокимларига ўзидаги ҳар бир туманда биттадан шундай тажрибани ташкил қилишни топширди. Янги йилдан оилавий боғча ўринларини 15 фоизига камбағал оила фарзандлари қабул қилиниши ва боғча тўлови қисман қоплаб берилиши белгиланди.

Ўзбекистон Халқ демократик партияси фракцияси ижтимоий ҳимоя йўналишидаги ислоҳотларни тўлиқ қўллаб-қувватлайди. Шу билан бирга, бу борада белгиланган вазифалар бўйича парламент ва депутатлик назоратини кучайтиришга алоҳида эътибор қаратади.

Инсонни улуғлаш ва эъзозлаш йўлидаги вазифаларни бажаришда барчамиз фаол бўлишимиз зарур.

Анваржон НУРМАТОВ,

Олий Мажлис Қонунчилик палатаси депутати,

ЎзХДП фракцияси аъзоси.