Бугунги глобаллашув ва рақамлаштириш жараёни тарихан шаклланган давлатчилик анъаналари ҳамда давлатларнинг бошқарув тизимига янги реалликлар, замонавий тенденциялар олиб кираётганига гувоҳ бўляпмиз.
Натижада демократик жамиятларда биринчи навбатда бюрократиядан воз кечиш тенденцияси жадаллашиб кетди. Бюрократия – фақат қоғозбозлик эмас, балки фуқароларнинг давлатга бўлган ишончига, иқтисодий самарадорликка, шунингдек, умумий ижтимоий кайфиятга бевосита таъсир кўрсатадиган омилдир.
Шу сабабдан, Ўзбекистон Президенти Халқаро конгресс марказида бюрократияни бартараф этиш масалаларига бағишланган халқаро форумдаги нутқида – Биз Янги Ўзбекистонни барпо этишда “Халқ давлат идораларига эмас, давлат идоралари халқимизга хизмат қилиши керак” деган инсонпарвар ғояга амал қиляпмиз, – деди.
Очиғини айтиш керак, бундан ўн йил олдин фуқароларимиз ҳужжат кўтариб давлат идоралари орасида сарсон бўларди. Ҳеч бир ишимиз силлиқ битмас эди.
Кейинги йилларда мамлакатимизда бюрократияни қисқартириш йўлида бир қатор фармон ва қарор қабул қилинди. Давлат хизматлари марказлари, Ягона портал платформаси, “Рақамли ҳукумат” каби тизимлар ташкил этилди. Натижада кўрсатилаётган хизматлар тури бугунги кунда 1 минг 40 тага етди. 90 дан ортиқ хизматларни проактив ва композит шаклда кўрсатиш йўлга қўйилди. Бунда туғилиш билан боғлиқ хизматларнинг композит шаклда кўрсатилиши одамларга катта қулайлик яратмоқда.
Халқ демократик партияси электорати бўлган аҳолининг эҳтиёжманд қатламларига ижтимоий нафақалар мурожаатларисиз автоматик тарзда амалга оширилмоқда.
Рақамлаштириш натижасида 30 турдаги хизматларни реал вақт режимида олиш имконияти яратилиб, жорий йилнинг ўзида 8 миллионга яқин хизматлар автоматик равишда кўрсатилган. Бу одамлар ҳеч бир ташкилотнинг эшигини тақиллатмасдан, уйида ёки кундалик машғулотидан ажралмасдан ўзига керак хизматдан фойдаланаётганини англатади.
Давлат раҳбари “Бюрократияни бартараф этиш – 2030” дастурни тасдиқлаб, унда энг аввало, давлат ва аҳоли, давлат ва бизнес ҳамда давлат тузилмасининг ички муносабатларида бюрократияни бартараф этиш, ҳар томонлама қулай давлат хизматлари экотизимини яратиш кўзланганини айтиб ўтди.
Жумладан, давлат хизматлари сони 1,5 мингтага, электрон хизматлар улуши 95 фоизга етказилади. Келгуси йилнинг ўзида 250 та хизматлар электрон шаклга ўтказилади. Проактив ва композит хизматларнинг сони 400 тага етказилади. Келгуси йилнинг ўзида 180 турдаги бундай хизматлар жорий этилади.
Ҳужжат аҳолининг давлат хизматларидан тез ва қулай фойдаланиши, тадбиркорликни рағбатлантириш, мамлакатнинг хорижий инвестициялар учун жозибадорлигини ошириш, рақамли бошқарув ва давлат бошқаруви соҳаларида мамлакатимизнинг халқаро майдондаги ижобий имижини шакллантиришга хизмат қилади.
Бу жараёнларнинг шаффофлигини ошириб, одамларни ортиқча оворагарчилик ва ҳужжатбозликдан халос этиши билан бирга, уларнинг давлатга бўлган ишончининг янада мустаҳкамланишига асос бўлади.
Ўзбекистон Халқ демократик партияси ва унинг Қонунчилик палатасидаги фракцияси мазкур дастурни тўлиқ қўллаб-қувватлайди. Партиямизнинг асосий мақсади аҳолининг эҳтиёжманд қатлами манфаатларини ҳимоя қилиш, фуқароларга тенг ва адолатли имкониятлар яратишдан иборат. Давлат хизматларининг қулай, шаффоф ва барча қатлам учун бирдек очиқ бўлиши – адолатли ижтимоий сиёсатнинг ажралмас қисми ҳисобланади.
Улуғбек ИНОЯТОВ,
Олий Мажлис Қонунчилик палатасидаги
ЎзХДП фракцияси раҳбари.