Олий Мажлис Қонунчилик палатасидаги Ўзбекистон ХДП фракцияси аъзоси Зокиржон Зохидов Фарғона вилоятининг Риштон туманида сайловчилар билан учрашувлар ўтказганида таълим масаласида мурожаатлар тушган эди.

Хусусан, ҳудуд жамоатчилиги вакиллари Риштон туман 1-сонли политехникуми «Мактабгача таълим ташкилоти тарбиячиси» бўйича янги йўналишга 120 нафардан зиёд фуқаролар билан дуал таълим шаклида шартномалар тузилгани, қўшни Бағдод ва Олтиариқ туманларидан ҳам фуқаролар мазкур йўналиш бўйича таълим олиш истагини билдираётгани маълум қилинди. Ўрганиш давомида келгусида политехникумда яна 150 нафар фуқаро билан шартномалар тузиш имконияти мавжудлиги аниқланган.

Шуларни инобатга олиб, депутат политехникумда ушбу таълим йўналиши очилишида амалий ёрдам беришни сўраб, Олий таълим, фан ва инновациялар вазири К.Шариповга сўров юборганди.

Сўровга вазирнинг биринчи ўринбосари Ш.Далиевдан жавоб келган бўлиб, “Мактабгача таълим ташкилоти тарбиячиси” мутахассислиги бўйича тегишли корхона ва ташкилотлар билан дуал таълим шаклида ўқишни ташкил қилиш юзасидан тузилган шартномалар, касбий таълим ташкилотининг моддий техник ва ўқув методик базаси мавжуд бўлганда политехникумга Вазирлик томонидан рухсат берилишини маълум қилинган эди.

Сайловчилар мурожаатлари ечим топиши ҳудудларнинг ҳар томонлама ривожланишига хизмат қилади.