Бугун Янги Ўзбекистонимизда мустақиллигимизнинг ўттиз тўрт йиллик байрами катта шод-у хуррамлик билан кутиб олинмоқда. Зеро, бу қутлуғ айём - янги тарихимиздаги энг улуғ, энг азиз сана. Бу халқимизнинг кўп минг йиллик тарихида буюк воқеадир. Ўтган йилларда эришилган ютуқ ва марралар замирида бу бебаҳо неъматнинг қадр-қиммати намоён.

Шунинг учун ҳам Мустақиллик байрамини катта тайёргарлик билан кутиб олиш биз учун эзгу анъанага айланиб қолган. Чунки бу байрам бутун миллат ва халқ тақдири билан боғлиқдир. Байрам арафасида босиб ўтган йўлимиз, амалга оширган ишларимизни сарҳисоб қилиб, бугунги зафарларимизни кўз ўнгимиздан ўтказишимиз табиий.

Шулар ҳақида ўйлаганимда айрим воқеалар тез-тез хаёлимда чарх уради. Ўшанда декабрь ойи эди. Қор ёққан, далалар оппоқ. Тонг ёришиб улгурмасдан ҳаммани далага олиб чиқишди. Эркаклар олдинда юриб, катта ёғоч билан ғўзалардан қорни қоқишар, аёллар, қизлар эса музлаб қолган пахта қолдиқларини не машаққатлар билан териб оларди. Қишлоқ хўжалигида, айниқса, пахта теримида болалар ва аёллар ҳам мажбурий равишда ишлатиларди. Дўконларда гўшт, шакар, ёғ, кийим-кечак каби маҳсулотлар доимий танқисликда бўларди.

Умуман, инсон, унинг қадри, ҳуқуқи, маънавий, миллий қадриятлари сўнгги ўринда турар эди. Аҳолининг кўп қисми қишлоқ хўжалигига боғланган, лекин моддий шароит заиф эди.

Халқимиз мустақилликдан олдин ана шундай оғир кунларни бошидан кечирди. Афсуски, бундай изтиробли, аянчли ҳолатларга мисоллар кўп эди. Ҳозир биз ана шу даврлар ҳақида фарзандларимизга, невараларимизга гапириб берсак, эртак эшитгандек бўлишади. Аммо буларнинг барчаси ҳақиқат, биз бошимиздан кечирган қийин кунлар эди.

Мустақиллик йилларида халқимиз ҳақиқий қадр-қиммат топди. Бундан 34 йил аввал бошланган янги тарих юз йиллик синовларнинг тугаши ва янги ҳаёт бошланишининг рамзи бўлди.

Шулар ҳақида кўп ўйлайман. Айниқса, Мустақиллик байрами арафасида ютуқ ва зафарларимизни кўриб, қаддимиз тикланган, қадримиз юксалган ана шундай даврлар учун минг-минг шукрона айтаман. Мустақиллик йиллари давомида барча жабҳаларда, жумладан, таълим-тарбия, илм-фан, маданият ва санъат, соғлиқни сақлаш, спорт, ижтимоий, иқтисодий, маънавият соҳаларида, турмуш тарзимиз мазмунида туб ўзгаришлар амалга оширилди. Руҳиятимиз, қадрият ва урф-одатларимиз эъзоз топди, инсон ҳуқуқлари ва фуқаролик жамиятига эътибор ошди.

Муҳим ютуқларимиздан яна бири бу - эркинлик ва очиқлик, қонун устуворлиги, жаҳон ҳамжамияти билан ўзаро манфаатли ҳамкорлик давлатимиз сиёсатининг асосий йўналишига айланди. “Янги Ўзбекистон – ижтимоий давлат” деган тамойил Конституция даражасида мустаҳкамланди.

Охирги саккиз йилда давлат бюджетидан таълим ва тиббиёт соҳаcига ажратилган маблағлар сезиларли даражада кўпайди. Айтайлик, 2016 йилда мактабгача таълим қамрови 27 фоиз бўлган. 2025 йилга келиб, бу рақам 76 фоизга етди. Олий таълимга қамров 42 фоизга етди.

2017 йилда кам таъминланган 500 минг оила ижтимоий ёрдам олган бўлса, бугунга келиб 2 миллиондан ортиқ оилага кўмак берилмоқда. Ажратилаётган маблағ эса 7 баробар кўпайтирилиб, йилига 11 триллион сўмга етди.

Кам таъминланган оилаларни аниқлаш ва уларга манзилли ёрдам кўрсатиш мақсадида “Ижтимоий ҳимоя ягона реестри” ахборот тизими жорий қилинди, кам таъминланган нафақа олувчи оилалар сони охирги уч йилда тўрт баробар ошиб, 1,9 миллионга етди.

Инсон қадри юксалган юртга муносиб бўлиб, ютуқларимизни асраб-авайлаш, янгидан- янги марраларни забт этиш барчамизнинг шарафли бурчимиздир.

Юртдошларимни биз учун қимматли бўлган Мустақиллигимиз байрами билан табриклайман! Мустақиллик – бу эркинлик, фахр ва келажакка ишонч рамзи. Мустақиллигимизнинг 34 йиллиги муборак бўлсин!

Олим РАВШАНОВ,

ЎзХДП Қашқадарё вилоят кенгаши раиси,

халқ депутатлари вилоят Кенгашидаги партия гуруҳи раҳбари.

«Ўзбекистон овози», 27.8.2025, №34