Коррупцияга қарши курашиш агентлигининг Ўзбекистон Республикасида коррупцияга қарши курашиш тўғрисидаги миллий маърузаси фракциямиз йиғилишида ҳам атрофлича муҳокама этилди.

Аввало таъкидлаш керакки, ушбу миллий маъруза ҳақидаги ахборот 2024 йилда мамлакатимизда коррупцияга қарши курашиш борасида муайян ишлар амалга оширилганлигини кўрсатмоқда.

Кейинги йилларда коррупцион омилларнинг олдини олишга қаратилган давлат хизматларини кўрсатиш жараёнларида инсон омили қисқариб, ягона интерактив давлат хизматлари портали орқали аҳолига кўрсатиладиган хизматлар сони 710 тага етган. Бу эса пенсия тайинлаш учун ариза бериш, тиббий маълумотнома олиш, кам таъминланган оилаларга болалар нафақаси ва моддий ёрдам тайинлашга ариза бериш, нафақа тайинлаш, талабалар учун таълим кредити олиш каби хизматларнинг электрон шаклга ўтказилиши бюрократия ва коррупция омилларини камайтиришга хизмат қилмоқда.

Коррупцияга қарши курашиш жараёнлари Ўзбекистон Халқ демократик партиясининг устувор дастурий мақсадлари, хусусан, давлатнинг фуқаролар олдида масъуллиги, уларнинг ҳуқуқлар ва имкониятлари тенглигини таъминлашда долзарб аҳамият касб этмоқда.

Бу борада амалга оширилган ижобий ишлар билан бир қаторда ушбу соҳада тўлиқ фойдаланилмаган имкониятлар ва эътибор қаратилиши лозим бўлган масалалар ҳам мавжуд.

Жумладан, манфаатлар тўқнашуви, давлат харидлари, давлат органларининг очиқлиги ҳамда бюджет маблағларидан самарали фойдаланиш бўйича коррупциявий ҳуқуқбузарликларнинг содир этилишига имкон бераётган шарт-шароитлар тўлиқ бартараф этилмаяпти.

Жорий йилнинг 5 март куни Коррупцияга қарши курашиш миллий кенгашининг кенгайтирилган йиғилишида коррупциянинг олдини олиш борасидаги ишлар натижадорлиги муҳокама қилиниб, устувор вазифалар белгилаб берилди.

Ўзбекистон ХДП фракцияси Агентликка:

– ҳудудларда аҳолини қийнаб келаётган маиший ва тизимли коррупциявий муаммоларни аниқлаш ва уларни бартараф этиш юзасидан чоралар ишлаб чиқиш ва таклифлар киритиб бориш;

– содир этилган коррупцияга оид жиноятларни таҳлил қилиши ҳамда ушбу жиноятлар кўрсаткичи ошган давлат органлари ва ташкилотлари билан кечиктириб бўлмайдиган чора-тадбирларни белгилаш ишларини кучайтириш;

– Ўзбекистонда коррупцияга қарши курашиш бўйича миллий стратегияни қабул қилиш ишларини якунига етказиш чораларини кўришни тавсия этди.

Фирдавс ШАРИПОВ,

Олий Мажлис Қонунчилик палатасидаги

ЎзХДП фракцияси аъзоси.

«Ўзбекистон овози», 17.9.2025, №37