Ўзбекистон ХДП масъуллари ва фаолларидан иборат ишчи гуруҳ республикамизда ишлаб чиқарилаётган ош тузининг ёдланганлик даражаси ва ишлаб чиқариш стандартларига қанчалик амал қилинаётгани бўйича ўрганиш олиб борди.

Ўрганишларда ҳудудлардаги айрим ишлаб чиқарувчилар ёдлаштириш талабларига тўлиқ амал қилмаётгани аниқланган эди. Масалан, Сурхондарё вилоятидаги “Хўжаикон туз” МЧЖда ош тузи тегирмонда майдаланиб эланмасдан ёдлаш ускунасига ўтказилаётгани, қолаверса, ишчилар учун етарлича шароит яратилмагани, “Чорбоғ Баракали Туз” МЧЖ ҳамда “РАСУЛЗОДАТУЗ” МЧЖлар қурилиш ишлари битказилмаган, том қисми очиқ, ҳаво айланиш қурилмалари ўрнатилмаган, чанг ушлаб қолувчи ускуналар уланмаган биноларда туз ишлаб чиқараётгани ва ош тузини ёдлаш технологик жараён асосида олиб борилмаётгани аниқланган эди.

Юқоридагилардан келиб чиқиб, халқ депутатлари Сурхондарё вилоят Кенгашидаги депутатлик гуруҳимиз раҳбари Алишер Пардаев Шеробод туман ҳокимлигига ва туман Санитария эпидемиологик осойишталик ва жамоат саломатлиги бўлимига ўрганиш натижасида аниқланган камчиликларни бартараф этиш масаласида депутат сўрови юборди.