Қонунчилик палатасидаги фракциямизнинг навбатдаги йиғилишида бир қатор қонун лойиҳалари муҳокама қилинди.

Экологик тоза ҳудудларнинг ҳуқуқий мақомини белгилаш ҳамда бир марталик пластик маҳсулотларни олиб кириш ва сотишни тартибга солиш тизимини такомиллаштиришга қаратилган қонуни лойиҳаси муҳокамадан ўтди.

Қонун лойиҳаси билан экологик тоза ҳудудлар тушунчаси киритилиб, улар жумласига экологик тизимларни сақлаб қолиш, табиат объектлари билан боғлиқ моддий маданий мерос объектларини асраш ва уларга салбий техноген таъсирнинг олдини олиш тартиби белгиланмоқда.

Мазкур лойиҳа бўйича узоқ мунозаралар бўлди. Хусусан, фракция аъзоси Ш.Назаров қонун лойиҳасининг техник жиҳатлари, хусусан, асосий тушунчалар тўлиқ ёритилмагани ҳақида эътирозларини айтиб ўтди. Депутатнинг фикрича, лойиҳа, аввало, унинг ижрочилари учун тушунарли бўлиши лозим. Агар лойиҳа киритилган тартибда қабул қилинса, эртага амалиётда катта бўшлиқлар, муҳокамали масалалар юзага келаверади.

Лойиҳада экологик тоза ҳудудларнинг режимини бузганлик учун маъмурий жазо чоралари белгиланмоқда. Жумладан, экологик тоза ҳудудларнинг режимини бузиш – фуқароларга базавий ҳисоблаш миқдорининг йигирма беш бараваридан эллик бараваригача, мансабдор шахсларга эса – эллик бараваридан етмиш беш бараваригача миқдорда жарима солишга сабаб бўлиши кўзда тутилмоқда.

Депутатлар жарималарни қўллашда аниқ механизм ишлаб чиқилиши кераклиги, белгиланмаган жойга битта пластик буюм ташлаган одам ўрмонга ўт қўйган билан бир хил жаримага тортилмаслиги, ҳар бир ҳаракат ижтимоий даражасидан келиб чиқиб баҳоланиши кераклигини таъкидлашди.

Фракция аъзолари қонун лойиҳасига кўплаб таклифлар ва ўзларининг ўринли эътирозларини билдиришди.

Депутатлар табиатни муҳофаза қилиш, соғломлаштириш ҳамда моддий маданий мерос объектларини асраб-авайлаш муҳимлигини ҳисобга олиб, кўрсатилган камчиликларни иккинчи ўқишга қадар тўғрилаш шарти билан биринчи ўқишда концептуал жиҳатдан маъқуллашди.