Давлат хизматларини кўрсатиш ва жарималар орқали давлат бюджетига тушадиган маблағлар мамлакатнинг иқтисодий барқарорлиги ва ижтимоий ривожланиши учун муҳим омиллардан ҳисобланади. Бу маблағларнинг тўғри ва самарали бошқарилиши давлатнинг асосий ижтимоий-иқтисодий мақсадларига эришишга кўмаклашади.
Шу боис, Ўзбекистон ХДП вазирлик ва идоралар томонидан давлат хизматларини кўрсатиш ёки жарима солиш натижасида тушадиган барча тушумларни тўлиқлигича Давлат бюджетига йўналтириш ташаббусини илгари сурмоқда.
Хорижий давлатлар тажрибасига эътибор қаратадиган бўлсак, аксарият мамлакатларда давлат хизматларини кўрсатиш ва жарима бўйича тушумлар давлат бюджетига йўналтиришига гувоҳ бўламиз.
Норвегияда давлат хизматлари ва жарималардан тушадиган даромадлар тўлалигича давлат бюджетига тушади. Масалан, барча йўл ҳаракати жарималари, рўйхатга олиш йиғимлари ва шунга ўхшаш даромадлар бюджетга ўтказилиб, давлат дастурларини молиялаштиришга йўналтирилади. Бу жараён “Давлат молияси тўғрисида”ги қонун билан тартибга солинади.
Финляндияда давлат хизматларидан тушган барча даромадлар ва жарималар давлат бюджетига тушишини таъминлаш бўйича қаттиқ назорат ўрнатилган. Жарималардан тушган барча даромадлар, масалан, транспорт воситасини рўйхатдан ўтказиш ёки йўл ҳаракати жарималари давлат ғазнасига ўтказилади. Давлат бюджети тўғрисидаги қонун бундай даромадларни давлат бюджетига тўлиқ ўтказиш тартибини белгилайди.
Тушумларни тўлиқ давлат бюджетига йўналтириш қуйидаги жиҳатлари билан муҳимдир:
- давлат бюджетига тушадиган маблағлар ижтимоий дастурларни молиялаштиришда, масалан, соғлиқни сақлаш, таълим ва инфратузилмани қўллаб-қувватлашда муҳим манба бўлиб хизмат қилади;
- давлатнинг молиявий барқарорлиги ва ички иқтисодиётни ривожлантиришга ёрдам беради;
- маблағлар бюджетга тўлиқ тушганидан сўнг давлат янги инфратузилмалар яратиш ва мавжудларини яхшилашга сармоя киритиш имконига эга бўлади.
Хулоса қилиб айтганда, давлат хизматлари ва жарималардан келиб тушадиган тушумларни тўлиқ давлат бюджетига йўналтириш мамлакат иқтисодиётини барқарор ривожлантиришда муҳим ўрин тутади. Бу нафақат давлат бюджетининг барқарорлигига ёрдам беради, балки ижтимоий дастурларни молиялаштириш, инфратузилмани яхшилашга ҳам кўмаклашади.