Муҳтожларга ёрдам бериш, қийналганнинг қўлидан тутиш каби эзгу фазилатлар халқимизнинг қонида бор. Ота-боболаримиз эҳтиёжмандларга елка тутиб, бунинг хотиржамлиги ва қалб осойишталиги билан бахт яратган.
Давлатимиз раҳбари раислигида ўтган ижтимоий ҳимоя соҳасидаги ишлар натижадорлиги ва 2025 йил учун устувор вазифалар муҳокамасига бағишланган йиғилишда билдирилган фикрлар барчамизни бу ҳақда чуқур ўйлаб кўришга, шунга қараб режалар тузишга ундади.
Ҳар қандай давлатда ҳам, ҳар қайси замонда ҳам ёрдамга муҳтож, кам таъминланганлар, кўп болали, ногиронлиги бор ёки ёлғиз қариялар учрайди. Адолатли жамият эса уларни ташлаб қўймайди, ҳимоя қилишни ўз зиммасига олади. Бугун Янги Ўзбекистоннинг эркин бозор муносабатларига ўтиш шароитида ижтимоий адолат ва ижтимоий барқарорликка асосланган халқпарвар сиёсати халқаро минбарларда эътироф этилаётгани кишига мамнуният бағишлайди.
Давлатимиз раҳбари бошчилигида ижтимоий ҳимоя бўйича эришилаётган натижалар буни тасдиқлайди. Йиғилишда қайд этилганидек, маҳалладаги ижтимоий ходимлар уйма-уй юриб, шу йил реестрда бўлмаган яна 95 минг муҳтож одамга ёрдам кўрсатди. 51 минг одамга ногиронлик белгиланди, 26 минги протез олди, ногиронлиги бор 5 минг бола боғча-мактабга жойлашди. Бу рақамлар оддий рақамлар эмас, уларнинг ортида қанчадан-қанча юртдошларимизнинг рози-ризолиги масаласи бор.
Энг муҳими, бу рақамлар, белгиланган янги вазифалар ижтимоий давлат тамойилларини мустаҳкамлаб, юртимизнинг инклюзив жамиятга айланишига мустаҳкам асос яратмоқда.
Уч ой олдин вилоят ва тумандаги 14 минг раҳбар 75 минг камбағал оилага бириктирилиб, улар билан индивидуал ишлаш йўлга қўйилди. Натижада, шу кунга қадар камбағал оилалардаги 17 минг одам доимий ишга жойлаштирилди, тадбиркорлик ва томорқа орқали 14 минг аҳолининг даромади оширилди, 30 минг бола боғча, тўгарак ва касбга ўқитиш билан қамраб олинди, 45 минг муҳтож аҳолига тиббий ёрдам кўрсатилди.
Бу жуда катта ва тарихий аҳамиятга эга натижалар, деб ўйлайман. Бунга эришилгани мамлакатда ижтимоий-иқтисодий ислоҳотлар самарали амалга оширилаётганини англатади.
Йиғилишда давлатимиз раҳбари бу масалага ҳам алоҳида эътибор берди. Келгуси йилда 1 миллион 200 минг аҳолини камбағалликдан чиқариш учун таълим, тўгарак, касб-ҳунар, тиббиёт масалаларини ҳал қилиш ва яшаш шароитини яхшилаш зарурлиги таъкидланди.
Мамлакатда ижтимоий ҳимояни кучайтириш, камбағалликни қисқартириш жараёнларида фаол иштирок этиш Халқ демократик партиясининг муҳим сиёсий вазифаси ҳисобланади. Вазифалар ва янги ташаббусларни тўлиқ қўллаб-қувватлаймиз. Уларнинг самарали амалга ошишида фаол иштирок этишни бурчимиз, деб биламиз.
Улуғбек ИНОЯТОВ,
Олий Мажлис Қонунчилик палатасидаги
Ўзбекистон ХДП фракцияси раҳбари.