Ортиқбоева Ҳаётхон Қодировна 1946 йил 22 августда Сирдарё вилоятининг Гулистон шаҳрида таваллуд топган. Тошкент давлат педагогика институтини тамомлаган аёл ўқитувчиликдан бошлаб, турли лавозимларда ишлаб келди. Сенаторлик даражасигача кўтарилди.

Ижодкорлик, депутатлик, сенаторлик ва бошқа бир қанча фаолиятни бир вақтда олиб борган, кўплаб хотин-қизларнинг йўлбошчиси, маслаҳатгўйи бўлган ширинсухан аёл, афсуски, энди орамизда йўқ.

Ҳаётхон Ортиқбоева исми нафақат Сирдарёда, балки республикамизда ҳам яхши таниш эди. Зеро, вилоятда адабий муҳит у кишининг номи билан боғлиқ, маданий-маърифий тадбирлар эса унинг иштирокисиз ўтказилмасди.

Марҳумани таниганлар унинг метин иродасига, қатъиятига, савиясига қойил қолиб, ҳар қандай ишни бошлашдан аввал мушоҳада қилиб олишига, атрофдагилар билан (ўзларидан кичик бўлса ҳам) маслаҳатлашишига кўп марта гувоҳ бўлганини таъкидлайди.

Яна бир муҳим жиҳати, аёлни юзлаб, ҳатто минглаб ёшлар устоз деб билган, устоз деб мурожаат қилган. Сон-саноқсиз ижодкор қизларнинг ютуқларига ҳисса қўшган. Қанчадан-қанча одамларнинг дардига қулоқ тутган, мушкулини осон қилган.

Ҳ.Ортиқбоева сенаторлик ва депутатлик фаолияти давомида кўп масалалар ечим топган. Чекка-чекка маҳаллалардан ҳам марҳумани излаб келувчилар, дармон истаганлар кўп бўлган. Парламентга масала киритишда, сўров юборишда, қонунлар муҳокамасида халқ ва Олий Мажлис ўртасида кўприк бўлган.

Аммо ҳаёт бир текисда ўтмайди. Бир неча йил олдин оғир дардга чалинди. Кўп ўтмай турмуш ўртоғидан ҳам айрилди. Шунга қарамай, оёққа туриб, фарзандлари, набиралари, қолаверса, ёшлар учун ибрат бўлишда дадиллик, куч топа олган эди.

Метин ирода, юксак салоҳият эгаси, қалбига жасорат ва меҳрни бирдек жойлай олган, яхшилик қилишни ҳаёт мазмунига айлантирган марҳуманинг яқинларига, оила аъзоларига чуқур ҳамдардлик билдирамиз. Кўп минг сонли партиямиз аъзолари, халқимиз Ҳаётхон Ортиқбоева номини унутмайди. Яхши ва гўзал хотиралар билан хотираларида сақлайди.

Ўзбекистон ХДП Марказий Кенгаши.