Сир эмаски, соғлиқни сақлаш соҳасида қатор ислоҳотлар амалга оширилмоқда. Хусусан, бирламчи тиббий-санитария ёрдами муассасаларида оилавий шифокорлар ёки тиббиёт бригадалари томонидан аҳолига тиббий ёрдамнинг кафолатланган ҳажмига кирадиган хизматлар бепул асосда кўрсатилмоқда. Шунингдек тиббиёт ва фармацевтика ходимларининг касбий малакасини ривожлантириш учун зарур шарт-шароитлар яратилмоқда.

Бироқ қонунчиликда бирламчи тиббий-санитария ёрдами муассасалари томонидан қўшимча хизмат турларини пулли асосда кўрсатилишини таъминлаш мақсадида тиббиёт ва фармацевтика ходимларини уларга берилган малака тоифаси бўйича давлат рўйхатидан ўтказишни назарда тутувчи тартибни белгилаш зарурати юзага келмоқда. Бунинг учун айрим қонун ҳужжатларига ўзгартириш ва қўшимчалар киритиш лозим. Бугун бўлиб ўтган Ўзбекистон ХДП фракцияси йиғилишида айни шу масала иккинчи ўқишда моддама-модда кўриб чиқилди.

Фракция раҳбари Улуғбек Иноятов мазкур қонун билан мос равишда “Фуқаролар соғлиғини сақлаш тўғрисида”ги ва “Дори воситалари ва фармацевтика фаолияти тўғрисида”ги қонунларга киритилиши кўзда тутилган ўзгартириш ва қўшимчалар Конституция ва бошқа меъёрий ҳужжатларда акс эттирилган инсон ҳуқуқларига зид келмаслигини таъкидлади. Ушбу соҳа вакиллари ўртасида қонуннинг асл мақсадини тўғри тушунтириш лозимлиги қайд этилди.

Олий Мажлис Қонунчилик палатасидаги Ўзбекистон ХДП фракцияси навбатдаги йиғилишида ташаббускорлар томонидан киритилган қонун лойиҳалари қаторида “Давлат ижтимоий суғуртаси тўғрисида”ги Ўзбекистон Республикаси қонуни” лойиҳаси иккинчи ўқишда муҳокама қилинди. Фракция аъзолари ўзларини қизиқтирган саволларга тушунтириш сўради, таклиф ва муносабатини билдирди.

Хусусан, депутат Шокиржон Аҳмедов таклиф этилаётган меъёрларнинг аҳоли ҳаётидаги аҳамиятини эътироф этди. Бироқ унинг натижадорлиги одамларнинг хабардорлигига бевосита боғлиқлигини таъкидлади. Аҳоли ўртасида тарғибот-ташвиқот ишларни кучайтириш зарурлигига алоҳида урғу берилди. Чунки қонун халқ учун ишлаб чиқилади ва уларга фойдали бўлиши лозим.

“Акциядорлик жамиятлари ва акциядорларнинг ҳуқуқларини ҳимоя қилиш тўғрисида” ҳамда “Масъулияти чекланган ҳамда қўшимча масъулиятли жамиятлар тўғрисида” қонунларга хўжалик жамиятларида хўжалик жамиятларининг ижро органи, кузатув кенгашининг фидуциар мажбуриятларини ҳамда мажоритар акциядорларининг ёхуд иштирокчиларининг умумий мажбуриятлари бўйича жавобгарликни аниқлаштириш.

Бугунги фракция йиғилишида айни ушбу масалаларда қонунчиликка ўзгартириш ва қўшимчалар киритиш назарда тутилган қонун лойиҳаси кўриб чиқилмоқда. Қонун ташаббускорлари лойиҳанинг концепциясини фракция аъзоларига тушунтириб берди.

Депутатларни лойиҳадаги янги сўзлар билан кириб келаётган тушунчаларнинг мазмуни қизиқтирди. Хусусан, фидуциар тушунчаси халққа тушунарли сўзлар билан ифодаланиши кераклиги таъкидланди.

Ташаббускорларга кўра, бу тушунча Президент қарор, фармонлари, ҳукумат ҳужжатларида келтирилган. Бироқ мазкур тушунча қонунчиликка янгилик сифатида киритилмоқда. Шу маънодан қонун ташаббускорлари фидуциар атамасининг маъносини изоҳлашга ҳаракат қилди.

Бироқ фракция аъзолари бу масалага депутатлар олдида эмас, қонунда ойдинлик киритиш кераклигини қайд этди. Асосий тушунчалар сифатида ушбу сўзнинг изоҳланиши кейинчалик ундан фойдаланувчилар учун қийинчиликларни юзага келтирмаслигига урғу берилди.

Ташаббускорлар фракция таклифини кейинги ўқишгача ўзгариш сифатида лойиҳага киритишини билдирди.

Муҳокамалардан сўнг лойиҳа концептуал маъқулланди.