Ўзбекистон Халқ демократик партияси Қорақалпоғистон Республикаси Кенгаши томонидан Бердақ номидаги Қорақалпоқ давлат университетида ташкил этилган “Депутат ва ёшлар” учрашувида олий ўқув юрти профессор-ўқитувчилари, талаба ёшлар, депутатлар, партиянинг “Ёшлар қаноти” аъзолари ва оммавий ахборот воситалари вакиллари иштирок этди.
Тадбирда сўзга чиққанлар бугунги кунда юртимизда олиб борилаётган кенг кўламли ислоҳотлар, шу жумладан, ёшларга яратилаётган имкониятлар, уларнинг ўз ташаббусларини рўёбга чиқаришлари учун яратилган шароитларга, партиянинг дастурий мақсад ва вазифаларини тарғиб қилишда партия ташкилотлари ва депутатлар ҳамда партиянинг ёшлар билан ишлаш йўналишида олиб борилаётган ишларга тўхталиб ўтди.
Шу билан бирга, “Атроф-муҳитни муҳофаза қилиш ва “яшил иқтисодиёт” йили” Давлат дастурининг мазмуни ва аҳамияти, шунингдек, мамлакатимизда ёшларга яратилаётган шароитлар, имкониятлар ва имтиёзлар ҳақида кенг тушунчалар берилди.
Кенг жамоатчилик муҳокамаси асосида жорий йил 30 январдаги Ўзбекистон Республикаси Президентининг фармони билан тасдиқланган Давлат дастурида ҳар бир инсонга ўз салоҳиятини рўёбга чиқариш учун муносиб шароитлар яратиш, барқарор иқтисодий ўсиш орқали халқнинг фаровонлигини таъминлаш, сув ресурсларини тежаш ва атроф-муҳитни муҳофаза қилиш, қонун устуворлигини таъминлаш, халқ хизматидаги давлат бошқарувини ташкил этиш ҳамда “Хавфсиз ва тинчликсевар давлат” тамойилига асосланган сиёсатни изчил давом эттириш йўналишларида 286 та амалий чора-тадбир, 101 та норматив-ҳуқуқий ҳужжат, 257 та мақсадли кўрсаткични амалга ошириш белгиланган.
Шунингдек, фармон билан, Атроф-муҳитни муҳофаза қилиш йўналишида вазирлик ва идоралар томонидан биринчи навбатда амалга оширилиши зарур бўлган чора-тадбирлар, “Яшил туризм” дастурини амалга ошириш чора-тадбирлар режаси, ҳудудларда кичик қувватли қайта тикланувчи энергия манбалари қурилмаларини ўрнатиш, баҳор-куз мавсумида “Яшил макон” умуммиллий лойиҳаси доирасида маҳаллаларда дарахтлар экиш бўйича, баҳор мавсумида маҳаллаларда гул ва кўчатлар экиш бўйича режалар тасдиқланди.
Давлат дастуридаги аксарият вазифалар аҳолининг турмуш тарзини янада яхшилаш, ижтимоий масалаларни самарали ечиш билан чамбарчас боғлиқ. Шу маънода ушбу дастур Ўзбекистон Халқ демократик партиясининг ғоя ва мақсадлари билан ҳар томонлама уйғун ва ҳамоҳангдир.
Учрашувда ёшларни қўллаб-қувватлаш, уларнинг манфаатларини ҳимоя қилиш бўйича фикр-мулоҳазалар билдирилиб, иштирокчилар ўзларини қизиқтирган саволларига жавоб олди.
Довуд Абибуллаев,
ЎзА мухбири.