Мамлакатимиз тарихида янги саҳифа очилди. Ўзбекистон, Тожикистон ва Қирғизистон давлат чегараларининг туташ нуқтаси тўғрисидаги шартнома имзоланди. Бу ўзаро ишонч ва яхши қўшничилик муносабатларини мустаҳкамлаш йўлидаги муҳим қадамдир.

Қайд этиш керак, Ўзбекистон, Тожикистон ва Қирғизистон уч мустақил давлат сифатида турли чегара ҳудудига эга бўлишига қарамай, азалдан уларни боғлаб турувчи умумий жиҳатлари бисёр. Бизнинг динимиз, еримиз ва сувимиз бир. Бир мақсад йўлида бирлашган ҳолда, қувончу шодлигимизда ҳам, қайғуйимизда ҳам доимо биргамиз.

Маълумки, ўн йиллар давомида чегара масалаларининг ҳал этилмагани, айниқса, аҳолиси зич Фарғона водийсида кескинлик ва низолар манбаи бўлиб келди. Бу ҳудудда уч мамлакат фуқаролари ёнма-ён, баъзан бир кўчанинг икки томонида яшаши одатий ҳол.

Ўтган давр мобайнида уч давлат ўртасида давлат чегарасини делимитация қилиш масалалари узил-кесил ҳал этилди. Фуқароларнинг чегара ва божхона постларидан ўтишларида муаммога сабаб бўлиб келган паспорт масаласи ҳал этилиб, бугунги кунда улар ўртасида ID паспорт орқали ўтиш имкониятининг яратилиши инсонларга янада қулайлик яратди.

Бугунги кунда мамлакатларимиз ўртасидаги ҳамкорлик алоқалари ижобий ўсиш суръатини қайд этмоқда. Айниқса, Ўзбекистон, Тожикистон ва Қирғизистон парламентлари, ҳукуматлари, вазирлик ва идоралари ўртасидаги очиқ, конструктив мулоқоти диққатга сазовордир.

Шунингдек, 2017-2018 йилларда Ўзбекистон — Қирғизистон давлат чегаралари тўғрисидаги шартнома, Ўзбекистон, Қозоғистон ва Туркманистон ўртасида давлат чегараларининг туташ нуқтаси тўғрисидаги шартнома, Ўзбекистон ва Тожикистон ўртасида чегара участкалари бўйича шартнома имзоланди.

Бундай келишувларга эришиш Марказий Осиёнинг барча давлатлари етакчиларининг кучли сиёсий иродаси, прагматик ёндашуви, ҳамкорлик ва ўзаро англашувга интилиши туфайли бўлди.

Энг муҳим натижалардан бири — бугунги кунда халқаро ҳамжамият Марказий Осиёга умумий ўзига хосликка ва ўзаро боғлиқ манфаатларга эга яхлит минтақа сифатида қарашни бошлади.

Энди чегаралар узил-кесил белгилангач, мамлакатларимиз учун савдо-иқтисодий, транспорт, маданий-гуманитар ва экологик ҳамкорликни кенгайтириш учун кенг имкониятлар очилмоқда. Бунинг мисли кўрилмаган иқтисодий самараси тез орада ўзини намоён этади.

Сўнгги йилларда Ўзбекистоннинг Қирғизистон ва Тожикистон билан товар айирбошлаш ҳажми ўн каррадан зиёдга ошди. Бу ҳажмнинг деярли ярми чегараолди ҳудудларга тўғри келади.

Шунингдек, бугунги кунда Ўзбекистон корхоналари ва хусусий компаниялари қўшни мамлакатларда замонавий ишлаб чиқариш қувватларини ташкил этишга фаол сармоя киритмоқда. Кооперацияни қўллаб-қувватлаш мақсадида мамлакатимиз раҳбари қўшма инвестиция жамғармалари капиталини босқичма-босқич ошириб бориш таклифини илгари сурди. Бу эса мамлакатларимиз иштирокида қўшма ёки ўзаро мувофиқлаштирилган ишлаб чиқаришни ташкил этиш масалаларида ҳамкорликни кучайтиришга замин яратади.

Юқоридаги тарихий ютуқлар ҳатто энг мураккаб масалаларни ҳам очиқ мулоқот, ҳурмат ва ўзаро ишонч орқали самарали ҳал этиш мумкинлигига ёрқин мисолдир. Бугун Марказий Осиё бутунлай янги — жипслашган ва кучли, дунёга ҳамда кенг кўламли шериклик учун очиқ минтақадир.

Дилбар МАМАЖОНОВА,

Олий Мажлис Қонунчилик палатаси депутати,

Ўзбекистон ХДП фракцияси аъзоси.