Ҳар йили Мустақиллик байрами арафасида қалбимда ўзгача қувонч ва масъулият туйғуси жўш уради. Чунки истиқлолнинг неъматини энг кўп ҳис қилаётган, унинг самарасидан фойдаланаётган ва келажагини қуришга интилган асосий куч — бу ёшлардир, мен ва тенгдошларимдир. Эркин юрт фарзанди бўлиш – бахт!
Бобо-бувиларимиздан кўп эшитардик, илгари одамлар турли чекловлар, таълимга эътибор йўқлиги муҳитида яшаган. Ҳозир эса ҳуқуқ ва эркинлик ҳар бир шахснинг ўз қўлида. Ёшлар интернет, технология, глобал алоқа ва эркин таълим шароитида камол топмоқда.
Ёшлар учун мустақиллик нафақат тарихий воқелик, балки уларнинг ҳаёт тарзи, орзу-умидлари ва имкониятлари билан чамбарчас боғлиқдир. Айниқса, кейинги йиллардаги имкониятлар биз ёшларга хорижда ўқиш, грантларда иштирок этиш, онлайн таълим олиш ва илмга эркин кириш имконини берди.
Ҳозир мен 5 та тилни биламан, дунёнинг бир нечта ривожланган давлатларида бўлганман, ўз бизнесимни йўлга қўйганман. Кўп ўйлайман, агар мустақиллик бўлмаганида, эҳтимол, мен бугунги даражада ўқиш, ривожланиш ва дунёга чиқиш имконига эга бўлмасдим. Мен учун мустақиллик – бу ўзини англаш ва жамиятда муносиб ўрин эгаллаш имконидир.
Мамлакатимизни турли соҳаларда ривожлантириш, аҳолининг турмуш даражаси ва ҳаёт тарзи яхшиланиши, мавжуд муаммолар бартараф этилишида ёшларнинг ҳам ҳиссаси катта.
Бугун ҳар бир соҳада муваффақиятга эришаётган, мамлакат ривожи, халқ фаровонлиги учун меҳнат қилаётган ёшлар сафи кенгаймоқда. Мен ҳам ана шу сафда эканимдан ғурурланаман.
Мустақиллик – бу фақат ўтмишдаги ютуқ эмас, балки келажакдаги имконият ҳамдир. Ёшлар бу неъматни қадрлаб, унинг ҳар бир жиҳатини тушунишлари ва уни асраб-авайлашлари керак. Чунки Янги Ўзбекистоннинг келажаги, тараққиёти ёшлар фаоллиги ва билимга чанқоқлигига боғлиқ.
Байрам билан барча юртдошларимизни, устозларимиз ва тенгдошларимизни чин қалбимдан табриклайман. Ватанимиз равнақи, халқимиз фаровонлиги йўлида доимо интилувчан, фидойи бўлишга ваъда берамиз. Ишончингизни албатта, оқлаймиз!
Шоҳида ШОВҚИЕВА,
Ёшлар парламенти аъзоси.
«Ўзбекистон овози», 27.8.2025, №34