Har yili Mustaqillik bayrami arafasida qalbimda o‘zgacha quvonch va mas’uliyat tuyg‘usi jo‘sh uradi. Chunki istiqlolning ne’matini eng ko‘p his qilayotgan, uning samarasidan foydalanayotgan va kelajagini qurishga intilgan asosiy kuch — bu yoshlardir, men va tengdoshlarimdir. Erkin yurt farzandi bo‘lish – baxt!

Bobo-buvilarimizdan ko‘p eshitardik, ilgari odamlar turli cheklovlar, ta’limga e’tibor yo‘qligi muhitida yashagan. Hozir esa huquq va erkinlik har bir shaxsning o‘z qo‘lida. Yoshlar internet, texnologiya, global aloqa va erkin ta’lim sharoitida kamol topmoqda.

Yoshlar uchun mustaqillik nafaqat tarixiy voqelik, balki ularning hayot tarzi, orzu-umidlari va imkoniyatlari bilan chambarchas bog‘liqdir. Ayniqsa, keyingi yillardagi imkoniyatlar biz yoshlarga xorijda o‘qish, grantlarda ishtirok etish, onlayn ta’lim olish va ilmga erkin kirish imkonini berdi.

Hozir men 5 ta tilni bilaman, dunyoning bir nechta rivojlangan davlatlarida bo‘lganman, o‘z biznesimni yo‘lga qo‘yganman. Ko‘p o‘ylayman, agar mustaqillik bo‘lmaganida, ehtimol, men bugungi darajada o‘qish, rivojlanish va dunyoga chiqish imkoniga ega bo‘lmasdim. Men uchun mustaqillik – bu o‘zini anglash va jamiyatda munosib o‘rin egallash imkonidir.

Mamlakatimizni turli sohalarda rivojlantirish, aholining turmush darajasi va hayot tarzi yaxshilanishi, mavjud muammolar bartaraf etilishida yoshlarning ham hissasi katta.

Bugun har bir sohada muvaffaqiyatga erishayotgan, mamlakat rivoji, xalq farovonligi uchun mehnat qilayotgan yoshlar safi kengaymoqda. Men ham ana shu safda ekanimdan g‘ururlanaman.

Mustaqillik – bu faqat o‘tmishdagi yutuq emas, balki kelajakdagi imkoniyat hamdir. Yoshlar bu ne’matni qadrlab, uning har bir jihatini tushunishlari va uni asrab-avaylashlari kerak. Chunki Yangi O‘zbekistonning kelajagi, taraqqiyoti yoshlar faolligi va bilimga chanqoqligiga bog‘liq.

Bayram bilan barcha yurtdoshlarimizni, ustozlarimiz va tengdoshlarimizni chin qalbimdan tabriklayman. Vatanimiz ravnaqi, xalqimiz farovonligi yo‘lida doimo intiluvchan, fidoyi bo‘lishga va’da beramiz. Ishonchingizni albatta, oqlaymiz!

Shohida SHOVQIYEVA,

Yoshlar parlamenti a’zosi.

«O‘zbekiston ovozi», 27.8.2025, №34