Дунёдаги энг қадрли нарса тинчлик бўлса, инсон учун саломатлик ҳаммасидан муҳимдир. Зеро, хаста одамнинг кўнглига на бир ўзгариш, на бир янгилик ва на бир сўз сиғади.

Кейинги йилларда халқимиз саломатлигини асраш, тиббий хизматлар сифатини ошириш бўйича катта ишлар қилинмоқда. Мустақиллик байрами арафасида бу соҳадаги ютуқлар ҳақида гапирмаслик нотўғри бўлса керак. Чунки, ҳар бир инсонга сифатли, қулай ва замонавий тиббий хизмат кўрсатиш — бу мустақилликнинг энг муҳим ютуқларидан бири ҳисобланади.

Мустақиллик йилларида Ўзбекистон тиббиёти катта босқичларни босиб ўтди. Шаҳар ва қишлоқларда янги шифохоналар, поликлиникалар, тез ёрдам марказлари қурилди. Қишлоқлардаги врачлик пунктлари янгиланди ва улар замонавий тиббий ускуналар билан жиҳозланди. Соҳадаги сифат ўзгаришлари энг олис ва чекка ҳудудларда яшовчилар ҳаётида ҳам акс этиши учун малакали тиббий хизматни аҳолига янада яқинлаштириш чоралари кўрилди.

Ўтган йилги таҳлилларга кўра, сўнгги беш йилда аҳолига тиббий ёрдамни янада яқинлаштириш мақсадида оилавий шифокорлик пунктлари, оилавий поликлиникалар, маҳалла тиббий пунктлари ташкил этилиб, уларнинг сони 4 600 дан ортди.

Сифатли тиббий хизмат кўрсатиш учун замонавий диагностик ва даволаш усуллари жорий этилди. Қишлоқларда жойлашган 820 та оилавий поликлиника янги замонавий УЗИ, ЭКГ аппаратлари, стоматологик ускуналар каби 11 турдаги тиббий жиҳозлар билан таъминланди.

Мамлакатимизда илғор тиббий технологиялар, шифокорларнинг малакасини ошириш дастурлари йўлга қўйилди. Шу билан бирга, инфекцияга қарши кураш, онкология ва бошқа касалликларга қарши курашда катта ютуқларга эришилди.

Жамиятдаги соғлиқни сақлаш давлатнинг зиммасидаги энг масъулиятли ва мураккаб масала саналади. Бунинг энг муҳим қисми бирламчи тиббий ёрдам ҳисобланади. Шундан келиб чиқиб, бугун оилавий поликлиникалар даражаларга ажратилди.

Сўнгги йилларда тиббиёт тизимида рақамлаштириш ишлари жадал олиб борилмоқда. Айнан ушбу тамойилни амалга ошириш учун бир қатор қонунларга ўзгартиришлар киритилди. Рақамли рецепт, рақамли тиббий кўрик каби хизматлар ёрдамида соатлаб навбат кутишлар, пул ва маблағ сарфлаш камайди. Энди фуқаролар уйда ўтирган ҳолда навбатга туриши, керакли маълумотнома ва бошқа ҳужжатларни олиши мумкин. Тўғри, бу айтаётганларимиз ривожланган мамлакатларда аллақачон илғорлаб кетган. Аммо юртимиздаги бу ўзгаришлар қисқа муддатда амалиётга кўчди. Муҳими, бунинг натижасида иш суръати ва самарадорлиги ошди. Бу орқали бюрократия камайди, беморларга хизмат кўрсатиш тезлашди ва шаффофлик ошди.

Шунингдек, онлайн регистратура, телемедицина хизматлари, масофадан маслаҳат бериш тизимлари орқали аҳолига тиббий ёрдам кўрсатиш янада қулайлашди.

Умуман олганда, соғлиқни сақлаш соҳасида амалга оширилаётган ислоҳотлар, яратилаётган шароитлар ва халқимизнинг фаровон ҳаёти – мустақиллик неъматининг амалий ифодасидир. Бу байрам халқимиз саломатлигини асрашга бўлган масъулият, ватанпарварлик ва меҳр тимсолидир.

Барчамиз учун улуғ ва азиз бўлган байрам муносабати билан ватандошларимни табриклайман! Мустаҳкам соғлик, тинч ва фаровон ҳаёт тилайман.

Қизилгул ҚОСИМОВА,

Олий Мажлис Қонунчилик палатасидаги

ЎзХДП фракцияси аъзоси.

«Ўзбекистон овози», 27.8.2025, №34