Dunyodagi eng qadrli narsa tinchlik bo‘lsa, inson uchun salomatlik hammasidan muhimdir. Zero, xasta odamning ko‘ngliga na bir o‘zgarish, na bir yangilik va na bir so‘z sig‘adi.
Keyingi yillarda xalqimiz salomatligini asrash, tibbiy xizmatlar sifatini oshirish bo‘yicha katta ishlar qilinmoqda. Mustaqillik bayrami arafasida bu sohadagi yutuqlar haqida gapirmaslik noto‘g‘ri bo‘lsa kerak. Chunki, har bir insonga sifatli, qulay va zamonaviy tibbiy xizmat ko‘rsatish — bu mustaqillikning eng muhim yutuqlaridan biri hisoblanadi.
Mustaqillik yillarida O‘zbekiston tibbiyoti katta bosqichlarni bosib o‘tdi. Shahar va qishloqlarda yangi shifoxonalar, poliklinikalar, tez yordam markazlari qurildi. Qishloqlardagi vrachlik punktlari yangilandi va ular zamonaviy tibbiy uskunalar bilan jihozlandi. Sohadagi sifat o‘zgarishlari eng olis va chekka hududlarda yashovchilar hayotida ham aks etishi uchun malakali tibbiy xizmatni aholiga yanada yaqinlashtirish choralari ko‘rildi.
O‘tgan yilgi tahlillarga ko‘ra, so‘nggi besh yilda aholiga tibbiy yordamni yanada yaqinlashtirish maqsadida oilaviy shifokorlik punktlari, oilaviy poliklinikalar, mahalla tibbiy punktlari tashkil etilib, ularning soni 4 600 dan ortdi.
Sifatli tibbiy xizmat ko‘rsatish uchun zamonaviy diagnostik va davolash usullari joriy etildi. Qishloqlarda joylashgan 820 ta oilaviy poliklinika yangi zamonaviy UZI, EKG apparatlari, stomatologik uskunalar kabi 11 turdagi tibbiy jihozlar bilan ta’minlandi.
Mamlakatimizda ilg‘or tibbiy texnologiyalar, shifokorlarning malakasini oshirish dasturlari yo‘lga qo‘yildi. Shu bilan birga, infeksiyaga qarshi kurash, onkologiya va boshqa kasalliklarga qarshi kurashda katta yutuqlarga erishildi.
Jamiyatdagi sog‘liqni saqlash davlatning zimmasidagi eng mas’uliyatli va murakkab masala sanaladi. Buning eng muhim qismi birlamchi tibbiy yordam hisoblanadi. Shundan kelib chiqib, bugun oilaviy poliklinikalar darajalarga ajratildi.
So‘nggi yillarda tibbiyot tizimida raqamlashtirish ishlari jadal olib borilmoqda. Aynan ushbu tamoyilni amalga oshirish uchun bir qator qonunlarga o‘zgartirishlar kiritildi. Raqamli retsept, raqamli tibbiy ko‘rik kabi xizmatlar yordamida soatlab navbat kutishlar, pul va mablag‘ sarflash kamaydi. Endi fuqarolar uyda o‘tirgan holda navbatga turishi, kerakli ma’lumotnoma va boshqa hujjatlarni olishi mumkin. To‘g‘ri, bu aytayotganlarimiz rivojlangan mamlakatlarda allaqachon ilg‘orlab ketgan. Ammo yurtimizdagi bu o‘zgarishlar qisqa muddatda amaliyotga ko‘chdi. Muhimi, buning natijasida ish sur’ati va samaradorligi oshdi. Bu orqali byurokratiya kamaydi, bemorlarga xizmat ko‘rsatish tezlashdi va shaffoflik oshdi.
Shuningdek, onlayn registratura, telemeditsina xizmatlari, masofadan maslahat berish tizimlari orqali aholiga tibbiy yordam ko‘rsatish yanada qulaylashdi.
Umuman olganda, sog‘liqni saqlash sohasida amalga oshirilayotgan islohotlar, yaratilayotgan sharoitlar va xalqimizning farovon hayoti – mustaqillik ne’matining amaliy ifodasidir. Bu bayram xalqimiz salomatligini asrashga bo‘lgan mas’uliyat, vatanparvarlik va mehr timsolidir.
Barchamiz uchun ulug‘ va aziz bo‘lgan bayram munosabati bilan vatandoshlarimni tabriklayman! Mustahkam sog‘lik, tinch va farovon hayot tilayman.
Qizilgul QOSIMOVA,
Oliy Majlis Qonunchilik palatasidagi
O‘zXDP fraksiyasi a’zosi.
«O‘zbekiston ovozi», 27.8.2025, №34