Юртимиз аҳолисининг 17 миллионини хотин-қизлар ташкил этади. Бу эса, аҳолимизнинг қарийб ярмига яқини демакдир. Уларнинг ҳуқуқ-манфаатларини таъминлаш, жамият ҳаётидаги ўрнини мустаҳкамлаш муҳим вазифалардан саналади. Қайд этиш керак, бу борада тизимли ишлар амалга оширилмоқда. Хусусан, хотин-қизлар сиёсатига доир 2 та қонун, Президентнинг 6 та фармон ва қарори қабул қилинди. Олий Мажлис Сенатда Хотин-қизлар ва гендер тенглиги масалалари бўйича қўмита ташкил этилди.

Хотин-қизларнинг сифатли таълим олиши, касб-ҳунарли бўлиб, бандлиги таъминланиши учун катта имкониятлар яратилди. Аёллар тадбиркорлиги, ташаббуслари қўллаб-қувватланаяпти. Хотин-қизлар муаммоларини ўрганиш ва манзилли ҳал этиш мақсадида “Аёллар дафтари” жорий этилди. Ушбу дафтарга 9 та мезон асосида хотин-қизларни киритиш, муаммоларини ҳал этиш йўлга қўйилди.

Ўзбекистон Халқ демократик партияси Хоразм вилоят Кенгаши томонидан Урганч давлат университети 2-сонли талабалар турар жойида "Хотин-қизлар ҳуқуқ ва манфаатлари олий қадрият" мавзусида ўтказилган давра суҳбатида юқорида баён этилганлар ҳақида сўз юритилди.

Давра суҳбатида сўзга чиққан партия вакиллари, ўқитуви ва талабалар мамлакатимизда амалга оширилаётган ислоҳотларда хотин-қизлар иштирокини таъминлаш, юрт истиқболи йўлида масъулиятни ўз зиммасига олишга қодир, юксак ахлоқли, маърифатли қизлар сафини кенгайтириш, ёшларга оид давлат сиёсатини амалга оширишда уларни ҳар томонлама қўллаб­қувватлаш, ҳуқуқ ва эркинликлари, қонуний манфаатларини ҳимоя қилиш борасида кўрилаётган чора-тадбирлар ҳақида фикр-мулоҳазалар билдирдилар.

Шунингдек, тадбирда қизларнинг таълим олиши, касб-ҳунар эгаллаши, бандлигини таъминлаш, ташаббуслари ва ижодий салоҳиятини қўллаб-қувватлаш мақсадида Хотин-қизлар тадбиркорлик маркази томонидан амалга оширилаётган ишлар ҳақида маълумотлар берилди.

Ўзбекистон ХДП Хоразм вилоят кенгаши

Ахборот хизмати.