Ўзбекистон Халқ демократик партияси Хоразм вилоят кенгашининг V пленуми бўлиб ўтди. Унда Кенгаш масъул ходимлари, туман ва шаҳар партия ташкилотлари раҳбарлари, халқ депутатлари маҳаллий кенгашлардаги партия гуруҳлари аъзолари, ёшлар ва аёллар қанотлари фаоллари, ҳамкор ташкилотлар ҳамда ОАВ вакиллари иштирок этди.
Пленумда Ўзбекистон Халқ демократик партияси дастуридаги устувор йўналишлари ҳамда 2022-2026 йилларга мўлжалланган Янги Ўзбекистоннинг тараққиёт стратегиясини амалга оширишда партия ташкилотларининг ҳамда депутатлик гуруҳларининг иштирокини таъминлаш, партия вилоят кенгаши Ижроия қўмитасининг 2021 йилдаги фаолияти тўғрисидаги масалалар муҳокама этилди.
Мажлисни Ўзбекистон Халқ демократик партияси Хоразм вилояти кенгаши раиси Юсупов Рахимберган олиб борди ва кун тартибидаги масалалар юзасидан маъруза қилди.
Маърузада партиянинг дастурий устувор йўналишларини амалга ошириш борасидаги фаолияти, 2022 йил учун ҳамда ўрта муддатли истиқболга мўлжалланган вазифаларни белгилаш масалалари танқидий-таҳлилий кўриб чиқилди. Шунинг билан бирга, давлат раҳбари ташаббуси билан амалга оширилаётган ислоҳотларнинг ижтимоий йўналтирилганлиги аҳолининг, айниқса, ижтимоий ҳимояга муҳтож қатламларнинг манфаатларини тўла маънода ифодаланиши қайд этилди. Янги Ўзбекистон тараққиёт стратегиясида сиёсий партиялар, парламент ва маҳаллий Кенгашларнинг халқимиз олдидаги масъулиятини кучайтириш бўйича муҳим ташаббус ва ғоялар илгари сурилгани, уларни амалга ошириш учун барча даражадаги депутатлик бирлашмалари, ҳудудий партия ташкилотларидан қатъият ва жавобгарлик талаб этилиши таъкидланди.
Пленумда халқ депутатлари Хоразм вилоят Кенгашидаги партия гуруҳининг 2021 йил иш фаолияти якунлари юзасидан ахбороти эшитилди ҳамда партия вилоят ташкилотининг 2021 йилги бюджети ижроси ва 2022 йил бюджетининг асосий кўрсаткичлари тўғрисидаги, шунингдек, туман (шаҳар) партия кенгашлари фаолиятига оид масалалар ҳам кўриб чиқилди.
Пленумда кўрилган масалалар юзасидан қарорлар қабул қилинди.
Ўзбекистон ХДП Хоразм вилоят кенгаши
Ахборот хизмати.