Кучли ижтимоий сиёсат Ўзбекистон Халқ демократик партиясининг бош ғояси ҳисобланади. Жамиятда ижтимоий тенгсизликнинг олдини олиш, ҳар бир инсоннинг муносиб шароитда, ҳар бир кунидан мамнун бўлиб яшашини таъминлаш билан боғлиқ дастурий мақсадлар мана шу ғоя атрофида мужассамлашган.
Халқ демократик партияси етакчилари 2024 йил 18 октябрь куни Наманган шаҳри Уч фаввора ҳиёбонида сайловчилар билан оммавий тадбирда юзма-юз учрашди.
Байрамона руҳда турли соҳа вакиллари, жамоатчилик фаоллари, кексалар ва ёшлар иштирокида ўтган тадбирда Халқ демократик партиясининг сиёсий куч сифатида давлат ва жамият ҳаётида тутган ўрни, таъсири ҳақида сўз юритилди. ХДПнинг барча фуқаролар учун бирдек манфаатли мақсад ва ғояларини қамраб олган янги Сайловолди дастури кенг таништирилди.
Хусусан, партия аҳолини арзон уй-жой ва сифатли коммунал хизматлари билан таъминлаш, қурилиш соҳасида самарали назоратни кучайтириш, фуқароларнинг Конституция билан кафолатланган ҳар кимнинг уй-жойли бўлиш ҳуқуқини таъминлаш учун арзон уй-жойлар қурилишини кенгайтиришга қатъий ҳаракат қилмоқда. Янги Сайловолди дастурида “Ижтимоий турар жойлар тўғрисида”ги Қонунни қабул қилиш ташаббуси илгари сурилаётган бўлиб, унда аҳолининг ижтимоий ёрдамга муҳтож қатламлари, жумладан уй-жойсиз, яшаш шароити ўта оғир, ногиронлиги бўлган ёки оила аъзолари орасида ногиронлиги мавжуд аёллар, оилавий болалар уйлари битирувчилари учун ижтимоий турар жойлар қуришни белгилаш назарда тутилмоқда.
Шунингдек, қурилиш соҳасида жамоатчилик ҳамда Давлат назоратини кучайтириш, қурилишларда яшил зона, мактаб, боғча, поликлиника, автотураргоҳ кабиларни инобатга олиш бўйича талабларни қонун даражасида қатъий белгилашга эришмоқчи. Бу бетартиб қурилишлар олдини олиши баробарида, қурилиш жараёнларини аҳолига ва атроф-муҳитга зарарсиз тартибда ташкил этишга хисса қўшади.
Дастурда одамларнинг кундалик кайфиятига таъсир қилувчи омилларга ҳам жиддий эътибор қаратилган бўлиб, сифатли коммунал хизмат кўрсатиш даражасини оширишга урғу берилган. Шу мақсадда “Коммунал хизматлар нархлари ва тарифларни тартибга солиш тўғрисида”ги Қонунни қабул қилиш режалаштирилган. Мақсад нархлар ва тарифларнинг очиқ, шаффоф бўлиши, уларнинг нархлари қанчалик асослантирувчи ҳарактерга эга эканига эришишдир. Қонунда коммунал хизматларининг нархлари ёки таърифларини тартибга солиш шартлари белгиланади.
Бундан ташқари, Халқ демократик партияси доим ногиронлиги бўлган шахсларнинг ҳуқуқ-манфаатларини ҳимоя қилиб келган. Бу йилги дастурда ҳам ногиронлиги бўлган шахсларнинг ҳуқуқ-манфаатларига алоҳида эътибор қаратилиши баробарида парламент ва маҳаллий Кенгашларга сайловларда ҳамда давлат фуқаролик хизматида “ногиронлиги бўлган шахслар учун квота” жорий этиш таклиф қилинмоқда.
Янги сайловда Халқ демократик партияси пешқадамлардан бўлишни, парламентда ва маҳаллий Кенгашлардаги депутатлик ўринларинларидан салмоқли қисмини эгаллашни мақсад қилган. Бунинг учун партиянинг тажрибаси ҳам, куч ва салоҳияти ҳам етарли экани наманганлик сайловчилар билан юзма-юз мулоқотда яна бир бор эътироф этилди.
Сайловчилар, айниқса, аҳолининг ижтимоий ҳимояга муҳтож қатлами манфаатларига хизмат қиладиган ташаббуслар маъқул келганини, бепул маслаҳат берадиган “юридик клиника”лар тармоғини ривожлантириш кам даромадли фуқароларнинг бузилган ҳуқуқларини ҳимоя қилишда адвокатура ва юридик хизматларнинг ижтимоий мақбуллигини таъминлашда ҳуқуқий ёрдам бўлиши ҳақидаги фикрларни маъқуллашди.
Шунинг билан бирга, йўлларда режалаштирилаётган таъмирлаш ишлари ва уларнинг давомийлиги ҳақидаги эълонни камида ўн кун олдин Интернет тармоғида эълон жойлаштириш, йўл-транспорт соҳасида қонунийликни таъминлаш мақсадида ҳайдовчилик ҳуқуқидан маҳрум этиш муддатини қисқартириш имкониятидан фақатгина бир маротаба фойдаланиш тартибини жорий этишга қаратилган таклифларга ҳам ижобий муносабатлар билдирилди.
Мулоқотда партия электорати вакиллари ҳам сўзга чиқиб, дастурдан ўрин олган таклифлар халқчил, ҳаётий эканини алоҳида эътироф этишди.
Юртимиз водийсининг бошқа вилоятларидан ҳам фаоллар, хайрихоҳларни жалб қилган оммавий тадбир давомида куй-қўшиқлар, рақс, хурсандчилик кайфияти ҳукм сурди. Қатнашчиларнинг сиёсий билимларини ошириш мақсадида қисқа савол-жавоблар викторинаси ўтказилди. Энг топқир иштирокчиларга тарғиботга қаратилган эсдалик совғалари берилди.
Тадбир якунида сайловларнинг аҳамияти ҳақида, юрт келажаги ва ўз тақдирига бефарқ бўлмаслик хусусида сўз юритилиб, Халқ демократик партиясига, унинг номзодларига овоз беришга чақириқлар янгради.
Халқ демокрактик партияси
Ахборот хизмати