Шу кунларда юртимизда, айтиш мумкинки, ҳар бир ватандошимиз қалбида Мустақиллик байрами шукуҳи мавж урмоқда. Ҳар бир оила ўз турмушидаги ўзгариш ва янгиланишлари, эришган натижалари, муродига етган орзу ниятлари ҳақида фикр юритмоқда, ҳаётий хулосалар қилмоқда.
Энг улуғ, энг азиз айёмимиз халқимиз билан бирга кўтаринки ва шукроналик руҳида кенг нишонланди. Президент Шавкат Мирзиёевнинг байрам табригида қўлга киритилган ютуқлар ҳақида муҳим фикрлар, аниқ ҳаётий рақамлар келтирилди.
Мир Алишер Навоий бобомизнинг “Бу оламни яратишдан мақсад – инсон эди, уни бахтли кўриш эди”, деган фикрларида чуқур маъно мужассамлиги қайд этилди. Таъкидланганидек, халқимиз асрлар давомида орзу қилиб, курашиб ўтган инсон қадрини улуғлаш, уни бахтли қилиш – барча ислоҳотларнинг маъно-мазмунига айланди.
Ўзбекистон инсон ресурсларига бой мамлакат, юртимиз аҳолиси йилига ўртача 700-800 минг кишига кўпаймоқда, меҳнат бозорига ҳар йили 500-600 минг нафар ёшлар кириб келмоқда. Бу, албатта, қувонарли рақамлар. Шу билан бирга, катта рақамлар олдимизга катта вазифаларни қўйиб келмоқда.
Ёшлар ўз-ўзидан ривожланиб, ҳаётда муносиб ўрин топиб қолмайди. Уларга шароит яратиш, илму ҳунар ўрганишини қўллаб-қувватлаш, бандлигига кўмаклашиш зарур. Бунинг учун мунтазам ишлайдиган тизим, кафолатли инвестиция ва инфратузилма керак. Инсон капиталини ривожлантириш чуқур ва масъулиятли ёндашувларни талаб қилади. Шу сабабли аниқ дастурлар қабул қилиниб, ижроси назоратга олинмоқда.
Давлат раҳбари “Ҳалол меҳнат – хотиржам ҳаёт ва фаровон жамият гарови” деган шиор асосида “яширин” иқтисодиётни жиловлаш бўйича муҳим чора-тадбирлар амалга оширилаётганини қайд этди. Дарҳақиқат, бу жиддий вазифа. Бу жараёнда фуқаролик институтлари, жамоатчилик назорати cубъектлари, парламент ва маҳаллий кенгашлар фаол иштирок этиши зарур.
Кейинги йилларда инсонни ҳимоя қилиш ва қўллаб-қувватлаш бўйича катта тизим яратилди. Ижтимоий ҳимоя сиёсатининг янги модели йўлга қўйилди. Ҳақли равишда тўғри қайд этилганидек, бу тизим хонадонларгача кириб боргани, эҳтиёжманд аҳоли билан индивидуал ишлаш йўлга қўйилгани, “Инсон” марказлари ташкил этилгани – барча учун тенг имконият яратилган инклюзив жамиятни шакллантиришга хизмат қилмоқда.
Хусусан, оғир ҳаётий вазиятга тушиб қолган, ногиронликнинг у ёки бу тури мавжуд фуқароларни ҳар томонлама қўллаб-қувватлаш, айниқса, уларнинг бандлигини таъминлаш борасида Ўзбекистон тарихан қисқа вақт ичида умумэътирофга лойиқ тажриба тўплади, деб ишонч билан айтиш мумкин.
Ижтимоий ислоҳотларни маҳалла даражасигача, яъни манзилли ташкил этиш, ижтимоий дафтарларни юритиш орқали эҳтиёжманд инсонларнинг турмуш шароитини ўнглаш, бунинг учун эса уларни ижтимоий-иқтисодий фаол ҳаёт билан қамраб олиш йўлида барча куч ва имкониятлар сафарбар этилмоқда. Бошқача айтганда, Ўзбекистон ижтимоий давлатга хос конституциявий мажбуриятларини, ҳар қанча қийин бўлмасин, муваффақиятли уддалашга интилмоқда.
Табрикда халқимизнинг ҳаёт фалсафасидан келиб чиққан яна бир фикр алоҳида таъкидланди. Яъни, юртимизда бегона одам ҳам, бегона бола ҳам йўқ. Барчамиз ягона юрт фарзандларимиз, ягона Ватан равнақига хизмат қиламиз. Шу маънода, битта бўлса ҳам қийин аҳволга тушиб қолган ҳамюртимиз тақдири барчамизни бирдек ташвишга солиши керак.
Халқимизнинг энг катта қудрати – меҳр-оқибат, саховат ва бирдамликда экани рост.
“Ҳамроҳлик дастури”га мувофиқ ота-она меҳридан маҳрум бўлган 11 минг нафар бола таълим, касб-ҳунар, спорт тизимига қамраб олингани муҳим натижа бўлди. Ҳозирги кунда эҳтиёжманд оилаларнинг 2,5 миллиондан зиёд аъзоларига 110 турдаги ёрдам ва хизматлар кўрсатиш йўлга қўйилди. Шу йилнинг ўзида ёрдамга муҳтож аҳолини ижтимоий ҳимоя қилишга 19 триллион сўм маблағ йўналтириляпти. Бу рақамлар, бундай натижаларни саноқли йиллар олдин ўйлаш, режалаштириш, ҳатто тасаввур қилиш қийин эди.
Инсонни қўллаб-қувватлаш ва ривожлантиришга қаратилган ислоҳотлар вақтинчалик ҳаракат эмас, бу борадаги саъй-ҳаракатлар тизимли тус олди, одамларнинг кундалик ҳаётига кириб борди. Халқимиз учун муносиб шароитлар яратиш борасидаги ислоҳотларимиз бир дақиқа ҳам тўхтамайди, деган қатъий позиция натижалар янада яхшиланишига хизмат қилади. Халқ демократик партиясининг сиёсий мақсади, ғоя ва таклифлари ана шу позиция билан уйғун экани бизга катта масъулият юклайди.
Мустақиллик нафақат ҳуқуқ ва эркинлик, шу билан бирга, доимий масъулият ҳамдир. Ҳаммамиз мана шу ҳақиқатни англаб, шунга муносиб ҳаракат қилишимиз зарур.
Қайд этилганидек, ҳар бир ватандошимнинг ютуғи – бу менинг ютуғим, ташвиши – менинг ташвишим, деган фикр билан яшасак, ютуғимиз кўпайиб, ташвишимиз албатта камайиб боради.
Улуғбек Иноятов,
Олий Мажлис Қонунчили палатасидаги
ЎзХДП фракцияси раҳбари