Shu kunlarda yurtimizda, aytish mumkinki, har bir vatandoshimiz qalbida Mustaqillik bayrami shukuhi mavj urmoqda. Har bir oila o‘z turmushidagi o‘zgarish va yangilanishlari, erishgan natijalari, murodiga yetgan orzu niyatlari haqida fikr yuritmoqda, hayotiy xulosalar qilmoqda.
Eng ulug‘, eng aziz ayyomimiz xalqimiz bilan birga ko‘tarinki va shukronalik ruhida keng nishonlandi. Prezident Shavkat Mirziyoyevning bayram tabrigida qo‘lga kiritilgan yutuqlar haqida muhim fikrlar, aniq hayotiy raqamlar keltirildi.
Mir Alisher Navoiy bobomizning “Bu olamni yaratishdan maqsad – inson edi, uni baxtli ko‘rish edi”, degan fikrlarida chuqur maʼno mujassamligi qayd etildi. Taʼkidlanganidek, xalqimiz asrlar davomida orzu qilib, kurashib o‘tgan inson qadrini ulug‘lash, uni baxtli qilish – barcha islohotlarning maʼno-mazmuniga aylandi.
O‘zbekiston inson resurslariga boy mamlakat, yurtimiz aholisi yiliga o‘rtacha 700-800 ming kishiga ko‘paymoqda, mehnat bozoriga har yili 500-600 ming nafar yoshlar kirib kelmoqda. Bu, albatta, quvonarli raqamlar. Shu bilan birga, katta raqamlar oldimizga katta vazifalarni qo‘yib kelmoqda.
Yoshlar o‘z-o‘zidan rivojlanib, hayotda munosib o‘rin topib qolmaydi. Ularga sharoit yaratish, ilmu hunar o‘rganishini qo‘llab-quvvatlash, bandligiga ko‘maklashish zarur. Buning uchun muntazam ishlaydigan tizim, kafolatli investitsiya va infratuzilma kerak. Inson kapitalini rivojlantirish chuqur va masʼuliyatli yondashuvlarni talab qiladi. Shu sababli aniq dasturlar qabul qilinib, ijrosi nazoratga olinmoqda.
Keyingi yillarda insonni himoya qilish va qo‘llab-quvvatlash bo‘yicha katta tizim yaratildi. Ijtimoiy himoya siyosatining yangi modeli yo‘lga qo‘yildi. Haqli ravishda to‘g‘ri qayd etilganidek, bu tizim xonadonlargacha kirib borgani, ehtiyojmand aholi bilan individual ishlash yo‘lga qo‘yilgani, “Inson” markazlari tashkil etilgani – barcha uchun teng imkoniyat yaratilgan inklyuziv jamiyatni shakllantirishga xizmat qilmoqda.
Tabrikda xalqimizning hayot falsafasidan kelib chiqqan yana bir fikr alohida taʼkidlandi. Yaʼni, yurtimizda begona odam ham, begona bola ham yo‘q. Barchamiz yagona yurt farzandlarimiz, yagona Vatan ravnaqiga xizmat qilamiz. Shu maʼnoda, bitta bo‘lsa ham qiyin ahvolga tushib qolgan hamyurtimiz taqdiri barchamizni birdek tashvishga solishi kerak.
Xalqimizning eng katta qudrati – mehr-oqibat, saxovat va birdamlikda ekani rost.
“Hamrohlik dasturi”ga muvofiq ota-ona mehridan mahrum bo‘lgan 11 ming nafar bola taʼlim, kasb-hunar, sport tizimiga qamrab olingani muhim natija bo‘ldi. Hozirgi kunda ehtiyojmand oilalarning 2,5 milliondan ziyod aʼzolariga 110 turdagi yordam va xizmatlar ko‘rsatish yo‘lga qo‘yildi. Bu raqamlar, bunday natijalarni sanoqli yillar oldin o‘ylash, rejalashtirish, hatto tasavvur qilish qiyin edi.
Xalqimiz uchun munosib sharoitlar yaratish borasidagi islohotlarimiz bir daqiqa ham to‘xtamaydi, degan qatʼiy pozitsiya natijalar yanada yaxshilanishiga xizmat qiladi. Xalq demokratik partiyasining siyosiy maqsadi, g‘oya va takliflari ana shu pozitsiya bilan uyg‘un ekani bizga katta masʼuliyat yuklaydi.
Mustaqillik nafaqat huquq va erkinlik, shu bilan birga, doimiy masʼuliyat hamdir. Hammamiz mana shu haqiqatni anglab, shunga munosib harakat qilishimiz zarur.
Qayd etilganidek, har bir vatandoshimning yutug‘i – bu mening yutug‘im, tashvishi – mening tashvishim, degan fikr bilan yashasak, yutug‘imiz ko‘payib, tashvishimiz albatta kamayib boradi.
Ulug‘bek INOYATOV,
Oliy Majlis Qonunchilik palatasidagi
O‘zXDP fraksiyasi rahbari.