Deputatlik faoliyatimni boshlashim bilan saylov okrugi hududi muammolarini o‘rgandim, aholi bilan uchrashib, ularning fikrlarini tingladim va murojaatlar bilan ishladim.

Bugun hududlarimizda yangiliklar ko‘p, o‘zgarishlar katta. Ammo odamlarimizni tashvishlantirayotgan, yechimini kutayotgan masalalar ham bor. Partiyamiz Harakat dasturining ijrosini ta’minlash orqali hududlardagi ko‘p muammolarga yechim topamiz.

Yaqinda bo‘lib o‘tgan deputatlik guruhimiz yig‘ilishida Harakat dasturi ijrosini ta’minlash, saylovchilarni o‘ylantirayotgan muammolarni sessiyalar muhokamasiga olib chiqish asosiy mavzu bo‘ldi. To‘g‘ri, deputatlik guruhlarimiz sessiyaga masala kiritishdan oldin tegishli muammo bo‘yicha nazorat-tahlil ishlarini olib borishadi. Masala joyiga chiqib o‘rganiladi, shu bo‘yicha qanday murojaatlar bo‘lgani ko‘rib chiqiladi. Shuningdek, monitoring davomida hududlarda ko‘chama-ko‘cha, uyma-uy yurib, har bir xonadon, har bir oilaga kirib boriladi, saylovchilarning e’tirozlari, takliflari eshitiladi.

Biz yaxshi bir tajribaga tayanib ish ko‘rishni rejalashtirdik. Ya’ni, “Kasalni davolagandan ko‘ra, uning oldini olgan afzal”, deyishadi-ku, shu ma’noda joylardagi muammolar haqida kimdir murojaat qilib kelishini kutib o‘tirmoqchi emasmiz. O‘zimiz odamlar orasiga, xalq ichiga kirib boramiz, ular duch kelayotgan muammolarni erta aniqlab, samarali hal qilish bosh maqsadimiz bo‘ladi.

Saylov okrugimdagi hududlarni o‘rganib chiqib, ichki yo‘llarni ta’mirlash, toza ichimlik suvi, ishsizlik, tibbiy xizmat sifatini oshirish bo‘yicha muammolar borligini aniqladim. Deputat sifatida birinchi navbatda ushbu muammolarni bartaraf etishga e’tibor qarataman. Ushbu masalalar bevosita partiyamiz Harakat dasturi bilan uyg‘undir. Ularning ijobiy hal qilinishi uchun deputatlik vakolatimdan to‘liq foydalanaman.

Sanjar VAFAYEV,

xalq deputatlari Yangihayot tuman Kengashi deputati.