Xalq deputatlari Chortoq tuman Kengashining Mahalliy budjet, tadbirkorlikni rivojlantirish va iqtisodiy islohotlar masalalari hamda Ijtimoiy soha yoshlar siyosati, madaniyat sport masalalari bo‘yicha doimiy komissiyalarining 1-yig‘ilishi bo‘lib o‘tdi.

Komissiya yig‘ilishida Xalq deputatlari tuman Kengashining navbatdagi sessiyasi muhokamasiga kiritilishi rejalashtirilgan masalalar ko‘rib chiqildi.

Avvalo, Chortoq tumani Iqtisodiyot va moliya bo‘limi boshlig‘ining 2025-yil uchun tuman mahalliy budjetini tasdiqlash bilan bog‘liq masala muhokama qilindi. Unda O‘zbekiston XDP guruhi elektorati manfaatlaridan kelib chiqib, savollar, fikr-mulohazalarini bildirdi. Ijtimoiy sohaga yo‘naltiriladigan mablag‘lar miqdori va maqsadliligi yuzasidan takliflar berildi.

Shu bilan birga, 2025-yil uchun yuridik va jismoniy shaxslarning qishloq xo‘jaligiga mo‘ljallanmagan yerlari uchun bazaviy soliq stavkalarini belgilash yuzasidan takliflar ham ko‘rib chiqildi.

Kun tartibidagi yana bir masala tuman oila va xotin-qizlar bo‘limi tomonidan sohada amalga oshirilayotgan ishlar, “Ayollar daftari” ro‘yxatiga kiritilgan xotin-qizlar muammolarini o‘rganish, ahvoli yaxshilangan opa-singillarimizni daftardan chiqarishga oid chora-tadbirlarga qaratildi.

Komissiya yig‘ilishida Chortoq tuman Kengashidagi O‘zbekiston XDP guruhi a’zosi Fayzullaxon Bahodirov o‘z takliflari, fikr-mulohazalarini bildirdi. Sessiya ishiga kiritilishidan oldin har bir masala yana bir karra ko‘zdan kechirilishi kerakligi ta’kidlandi.