O‘zbekiston Xalq demokratik partiyasidan saylangan buxorolik deputatlardan biri boshlang‘ich sinf o‘quvchilarini rag‘batlantirish maqsadida shaxsiy tashabbusini joriy qildi. Ya’ni, 21-Do‘stlik saylov okrugi deputati O.Hakimov Buxoro tumanidagi 3-son ixtisoslashtirilgan umumiy o‘rta ta’lim maktabida deputat stipendiyasi tashkil qildi. Deputat stipendiyasiga ega bo‘lish uchun maktabda 3 bosqichda tanlov o‘tkazildi.

Birinchi shartga ko‘ra o‘quvchilar bilim sifati asosida tanlandi. Ikkinchi turda ularning o‘qigan badiiy kitoblaridan savol-javob qilindi. 3-bosqichda saralangan bolajonlar sportning shashka yo‘nalishi bo‘yicha musobaqada ishtirok etdi.

Yakuniy natijalar bilan 3-"a" sinf o‘quvchisi Sevinch Farmonova deputat stipendiyasi g‘olibi bo‘ldi va tuman Kengashi deputati Odil Hakimov pul mukofoti bilan taqdirladi. Ushbu tanlov yil davomida o‘tkaziladi va bolalarni o‘qishga rag‘batlantirishga hissa qo‘shadi.

E’tiborlisi, nafaqat boshlang‘ich sinflar, balki yuqori sinf o‘quvchilarini bilim olishga rag‘batlantirishga qaratilgan bu kabi tashabbuslar viloyatning boshqa hududlarida ham yo‘lga qo‘yilgan.