Buxoro viloyati Qorako‘l tumani «Tinchlik», «Arabxona» va «Qoraxoji» mahalla fuqarolar yig‘inlarida sayyor qabul o‘tkazildi.

Xalq deputatlari Qorako‘l tuman Kengashidagi O‘zbekiston XDP guruhi a’zolari L.Shermuhammedova va Sh.Salomov fuqarolar bilan yuzma-yuz muloqot qildi. Suhbat davomida bir qancha muammo o‘rtaga tashlandi va muhokama qilindi. O‘rganilgan holatlar yuzasidan tegishli tashkilotlarga deputat so‘rovi bilan murojaat yuborildi.

Joyida hal qilinishi mumkin bo‘lgan masalalar ham yechim topdi. Misol uchun, deputatlar ko‘magida «Qoraxoji» mahallasida istiqomat qiluvchi ijtimoiy himoyaga muhtoj yolg‘iz fuqaro Ochilgul Xolboyevaga 1 sotixlik issiqxona qurib berildi.

Murojaatlari yechim topgan mahalla ahli minnatdorlik bildirar ekan, deputatlardan huquqiy maslahatlar ham olishdi.

Deputatlik so‘rovi natijalariga ko‘ra, hududdagi vaziyat yana o‘rganilishi ta’kidlandi.