Bugungi kunda maktabgacha ta’lim tashkilotlarida bolalar hayoti va sog‘lig‘ini ishonchli himoya qilish masalasi jamiyat uchun eng ustuvor va kechiktirib bo‘lmaydigan vazifalardan biri sifatida namoyon bo‘lmoqda. Ayniqsa, oziq-ovqat, sanitariya-gigiyena hamda umumiy xavfsizlik talablariga rioya qilinishi masalasi jamoatchilik orasida doimiy muhokama mavzusiga aylanmoqda.
Ommaviy axborot vositalari va ijtimoiy tarmoqlarda tez-tez uchrayotgan bolalarning ovqatdan zaharlanishi, elektr toki urishi yoki yong‘in xavfi bilan bog‘liq noxush holatlar masalaga jiddiy va tizimli yondashishni taqozo etmoqda.
Shularni hisobga olgan holda, Xalq demokratik partiyasi maktabgacha ta’lim tashkilotlarida bolalar xavfsizligini deputatlik va jamoatchilik nazorati tartibida respublika miqyosida o‘rganishga kirishmoqda.
Mazkur maqsadda partiyaning mahalliy Kengashlardagi guruhlari tomonidan maktabgacha ta’lim tashkilotida xavfsizlik talablariga rioya etilishi holatini o‘rganishga qaratilgan chora-tadbirlar dasturi ishlab chiqildi.
Dastur doirasida Qonunchilik palatasi va mahalliy Kengash deputatlari va, albatta, vakolatli tashkilotlar vakillari ishtirokida ishchi guruhlar tuzilishi rejalashtirilgan. Bolalar hayoti va sog‘lig‘iga xavf tug‘diruvchi omillar maxsus savolnoma asosida manzilli o‘rganilishi belgilangan.
Manzilli tahlillar natijalari va xulosalari hududlarda Xalq demokratik partiyasining mahalliy Kengashlardagi deputatlik guruhlari yig‘ilishlarida soha mutasaddilari ishtirokida ochiq muhokama qilinadi. Vaziyat jiddiy bo‘lgan hududlarda partiya deputatlik guruhlari qarorlariga muvofiq ravishda masalani mahalliy Kengashlar sessiyalari muhokamasiga olib chiqish nazarda tutilgan.
Xalq demokratik partiyasi maktabgacha ta’lim tashkilotlarida bolalar xavfsizligini ta’minlash o‘z elektoratini o‘ylantirayotgan dolzarb ijtimoiy masalaga aylanganini ta’kidlaydi.
Hududlardagi tizimli o‘rganish, ochiq muhokamalar yakunlari bo‘yicha mas’uliyat va nazoratni kuchaytirish maqsadida tegishli davlat organlari vakillari ishtirokida Xalq demokratik partiyasining Qonunchilik palatasidagi fraksiyasida muhokamalar o‘tkaziladi, ta’sirli kompleks chora-tadbirlar va zaruratga qarab qonunchilikni takomillashtirishga oid takliflar ishlab chiqiladi.