Statistika ma’lumotlariga qaraganda, mamlakatimizda o‘rtacha 2 400 nafar aholiga bitta dorixona to‘g‘ri kelmoqda. Dorixonalarning ko‘pligini salbiy holat sifatida tushunish kerak emas, albatta. Ammo aholida dori-darmon vositalariga qaramlikning ortib borishi ham ijobiy hol hisoblanmaydi.

O‘zbekiston Xalq demokratik partiyasining joriy yili bo‘lib o‘tadigan saylovlar oldidan ilgari surgan tashabbuslaridan biri zamonaviy tibbiyot va xalq tabobatini uyg‘unlashtirgan holda davolash standartlarini joriy etish orqali doriga qaramlikni kamaytirish g‘oyasidir.

Bunday yondoshuv davolanish natijalarini yaxshilaydi, nojo‘ya ta’sirlarni kamaytiradi va bemorlarning hayot sifatini yaxshilaydi. Xalqaro tajriba shuni ko‘rsatadiki, turli tibbiy amaliyotlar integratsiyasini to‘g‘ri tashkil etish, ushbu integratsiyani davlat va tibbiyot hamjamiyatining ko‘magi bilan amalga oshirish orqali samarali natijalarga erishish mumkin.

Dori yukini kamaytirishning asosiy afzalliklaridan biri ko‘plab dori-darmonlarni qabul qilishda tez-tez yuzaga keladigan nojo‘ya ta’sirlar xavfini kamaytirish hisoblanadi. Ko‘p komponentli terapiya dorilarining o‘zaro ta’siriga olib kelishi mumkin, bu esa asoratlar va salbiy reaksiyalar ehtimolini oshiradi. Qabul qilingan dorilar miqdorini kamaytirish ushbu xavflarni kamaytirishga ko‘maklashadi.

Dori yukini kamaytirish bemorlarning umumiy holatini yaxshilashga yordam beradi. Dorilarni kamroq iste’mol qilish jigar, buyraklar va boshqa organlarga yukni kamaytiradi, bu, ayniqsa, keksalar va surunkali kasalliklarga chalingan bemorlar uchun juda muhimdir.

Dorilarga qaramlikni kamaytirish iqtisodiy ahamiyatga ega. Dori-darmonlar sonini kamaytirish bemorlar uchun ham, umuman sog‘liqni saqlash tizimi uchun ham davolanish xarajatlarini kamaytiradi. Xalq tabobatini davolash standartlariga kiritish xarajatlarni yanada kamaytirishi mumkin.