Xalq deputatlari Urganch tuman Kengashidagi O‘zbekiston XDP guruhi a’zosi Guliston Radjapova o‘zi saylangan Xojiboylar, Shoxidonlar, Oq maktab mahallalarida bo‘lib, aholi vakillari bilan uchrashdi.

Deputat Agrotexnika texnikumi binosida tuman prokurori S.Gaybiyev, xalq qabulxonasi mudiri E.Sapayev hamkorligida fuqarolarni qabul qildi. Qabul jarayonida tegishli idora va tashkilot rahbarlari, fuqarolar qatnashdilar.

Qabul jarayonida fuqarolarning muammolari o‘rganildi va murojaatlari tinglandi.

Murojaatlar asosan uylarning tom qismini ta’mirlash, bola puli, ta’lim krediti olish bilan bog‘liq bo‘ldi. Shuningdek, o‘z ishini boshlash istagidagilar kam foizli kredit masalasi, «Oq maktab» ko‘chasidagi yer ostidan o‘tgan eski 100 metr gaz trubasini yer ustidan o‘tkazish, maishiy chiqindilar uchun maxsus konteynerlar qo‘yib berish masalalarida amaliy yordam so‘rashdi.

Murojaatlarning ba’zilari shu joyning o‘zida hal qilindi, ba’zilariga tegishli tashkilot rahbarlariga deputatlik so‘rovi bilan murojaat qilish belgilab olindi.