Nogironligi bo‘lgan shaxslarning ijtimoiy xizmatdan foydalanishini ta’minlash, ularning og‘irini yengil qilish, muammolarini hal etishga yaqindan yordam berish O‘zbekiston Xalq demokratik partiyasi g‘oya va maqsadlari bilan uyg‘undir.
Prezidentimizning 2025-yil 3-fevraldagi “Nogironligi bo‘lgan bolalarga ijtimoiy xizmat va yordam ko‘rsatish tizimini yanada takomillashtirish bo‘yicha qo‘shimcha chora-tadbirlar to‘g‘risida”gi qarorida “Kambag‘allikdan farovonlik sari” dasturi ijrosini ta’minlash, ijtimoiy xizmat va yordam ko‘rsatish ko‘lamini kengaytirish orqali oilalarning mehnat qilish imkoniyatini cheklovchi sabablarni bartaraf etish yuzasidan muhim vazifalar belgilandi. Jumladan, nogironligi bo‘lgan bolalarning oila qaramog‘ida qolishini kafolatlash va ijtimoiy yetimlikning oldini olish maqsadida 2025-yil 1-martdan boshlab tajriba-sinov tariqasida bosqichma-bosqich Qoraqalpog‘iston Respublikasi, Andijon, Qashqadaryo, Samarqand, Surxondaryo va Toshkent viloyatlari hamda Toshkent shahrida, 2025-yil 1-oktabrga qadar respublikaning qolgan hududlarida 3 yoshdan 18 yoshgacha o‘g‘il-qizlar uchun davlat-xususiy sheriklik asosida kunduzgi parvarish xizmati yo‘lga qo‘yiladi.
Yana bir muhim jihat, joriy yilda 40 ta tumanda reabilitatsiya, sog‘lomlashtirish va nogironligi borlarga qarovchilarni o‘qitish bo‘yicha ko‘p tarmoqli ijtimoiy xizmatlar markazlari ishga tushirilmoqda. Bu o‘z navbatida ijtimoiy ko‘makka muhtoj insonlar turmush darajasining yaxshilanishiga xizmat qiladi.
Nogironligi bo‘lgan shaxslarga “to‘siqsiz hayot” yaratish dolzarb masala ekanini alohida ta’kidlash joiz. Nogironligi bo‘lgan shaxslarga ishlash va kasb-hunarga o‘qishda to‘siqsiz muhit yaratish uchun ularning “mehnatga layoqatini belgilash” amaliyotidan voz kechilib, nogironlik kasallikka qarab emas, balki shaxsning mustaqil harakati, muloqot qobiliyati va ijtimoiy hayotdagi ishtirokiga qarab belgilanadi. Shuningdek, oilaviy tadbirkorlikni rivojlantirish maqsadida oilasida nogironligi bo‘lgan shaxslarga davlat tomonidan ajratiladigan imtiyozli kreditlardan foydalanish imkoniyatlari taqdim qilinmoqda.
Lekin mamlakatimiz hududlarida nogironligi bo‘lgan shaxslar huquqlarini ta’minlash borasida ma’lum bir muammolar hamon kuzatilayotganidan ham ko‘z yumib bo‘lmaydi. Nogironligi bo‘lgan shaxslarni ishga qabul qilgan ish beruvchilarni moddiy qo‘llab-quvvatlashning samarali mexanizmlari yo‘lga qo‘yilmagani, oliy ta’lim muassasalari va maktablar binolari hamma joyda ham nogironligi bo‘lgan shaxslar mustaqil harakatlanishi uchun qulay emasligi, ta’lim muassasalarida Brayl alifbosidagi darsliklar kamligi shular jumlasidandir.
Shu nuqtai nazardan viloyat va tumanlarda bino va inshootlarni qurish loyihalari nogironligi bo‘lganlar uchun qulay muhit yaratilganligi bo‘yicha ham majburiy ekspertizadan o‘tkazilishi, jamoat transporti, bekatlar va chorrahalarda ular uchun to‘siqsiz muhit yaratish choralarini jadallashtirish ijtimoiy inklyuzivlikni oshirishga imkon beradi.
Aytish joizki, partiyamiz deputatlari va faollari Farg‘ona viloyatida nogironligi bo‘lgan shaxslar va ularning oila a’zolariga ijtimoiy huquqlaridan keng foydalanishi uchun yaqindan yordam ko‘rsatmoqdalar. Shu bilan birga yuqoridagi qarorning ahamiyatini jamoatchilikka yetkazish, nogironligi bo‘lgan bolalar kunduzgi parvarish xizmatiga qay tartibda qabul qilinishi bo‘yicha tushuntirish ishlarini olib bormoqdalar.
2025-yil 1-sentabrga qadar bolalarning rivojlanishida kuzatiladigan nuqsonlarni erta aniqlash va o‘z vaqtida kompleks ijtimoiy-tibbiy yordam bilan qamrab olish, ularda nogironlikning oldini olish hamda nogironligi bo‘lgan bolalarda muvaffaqiyatli ijtimoiylashuvni ta’minlashga ko‘maklashuvchi “Bolalar salomatligi” axborot tizimini joriy etish masalasi ham diqqat markazimizda turibdi. Buning uchun Toshloq tumani 45-Zarkent okrugi hududida ro‘yxatga olingan bolalar uchun tibbiy, reabilitatsiya, ta’lim, ijtimoiy xizmatlar ko‘rsatish borasida hududlardagi poliklinikalar hamda ta’lim muassasalari vakillari bilan hamkorlikda tegishli vazifalar belgilanmoqda.
Anvarxon NABIYEV,
xalq deputatlari Farg‘ona viloyat Kengashi deputati.
«O‘zbekiston ovozi», 2.4.2025, №13