Mana hash-pash deguncha saylovga ham qariyb 3 oyga yaqin vaqt o‘tdi. Bu davr mobaynida kimdir saylovchilar bilan muloqotlar o‘tkazishga, ular bilan yanada yaqindan tanishishga ulgurgan bo‘lsa, kimdir hanuz vazifasiga to‘liq kirisha olmadi. Muhimi, faol va tashabbuskor xalq vakillari ko‘pchilikni tashkil qiladi.

Jumladan, O‘zbekiston Xalq demokratik partiyasidan saylangan deputatlar joylarda aholi murojaatlari bilan ishlab, ularga yechim topishda ancha jonbozlik ko‘rsatmoqda. Masalan, Xalq deputatlari Zafarobod tuman Kengashidagi partiyamiz guruhi a’zosi, 16-Boqquduq saylov okrugidan saylangan deputat Bahrom Hamroqulov "Pistalikent" SHFY hududida saylovchilar bilan uchrashdi. Ularni tashvishga solayotgan masalalarni o‘rgandi. Ko‘chalarning ko‘chalarning obodligi va tozaligiga e’tibor qaratdi.

Aholi murojaatiga ko‘ra, shaharchada chiqindilarni olib chiqib ketish masalasida oqsoqliklar mavjud. Natijada axlat uyumlari ancha ko‘payib, odamlar sog‘ligiga ham ta’sir ko‘rsata boshlagan. Deputat ko‘magida hududdagi chiqindilarni olib ketish uchun maxsus transport vositalari jalb qilindi. Bu amaliy yordamdan aholi minnatdor bo‘ldi.